Ыам ыйын 1 күнүгэр дьаһалта тырахтарыыһа Алексеев В.В уонна Федоров Ю.Н.нэһилиэк ыалларыттан куулламмыт бөхтөрү хомуйан, бөҕү-сыыһы кутар сиргэ икки бырысыабынан тиэйдилэр.Ыам ыйын 8 күнүгэр анал байыаннай дьайыыга сылдьар Самуил Иванов төрөппүттэригэр оттук маһы бэлэмнээн дьиэ таһыгар киллэриигэ субуотунньук буолла. Барыта үс бырысыап мас бэлэмнэнэн дьиэ таһыгар а5алылынна. Маны сэргэ спортивнай былаһааккаҕа эбии баскетбольнай корзиналары туруордулар.
Ыам ыйын 9 күнүгэр Улуу Кыайыы 79 сылын көрсө көхтөөх тэрээһиннэр буоллулар. Сарсыарда колонналар түөлбэлэртэн сэлэлии хааман кулууп иннигэр Степанов Н.С. аатынан Кыайыы болуосстыгар кэллилэр. Бырааһынньыктааҕы миитини нэһилиэк аҕа баһылыга Федоров А.Ю. уонна Ытык Сүбэттэн сэрии сылын оҕото Алексеев Василий Дмитриевич эҕэрдэ тыл эттилэр. Кыайыы иһин турууласпыт,тыыннарын толук уурбут дьоммутун кэриэстээн иһийии мүнүүтэтэ буолла. Салгыы үрдүкү кылаас уолаттара кыайыыга аналлаах обелиска өйдөбүнньүк гирлянда, олохтоохтор кыһыл гвоздика уурдулар. Ити кэннэ ырыанан -үҥкүүнэн эҕэрдэ нүөмэрдэр дьиэрэйдилэр. Степанов Вова ветераннар тустарынан ырыата уонна оскуола кыргыттарын Ульяна Иванова туруоруутунан «Кыталыктар” үҥкүүлэрэ дьону уйадыттылар. Үгэс быһыытынан тэрилтэлэр сэрии сылын оҕолоругар, байыаннай дьайыы кыттыылаахтарыгар тус эҕэрдэлэри бэлэхтэри туттардылар. Маны тэҥэ “Ымыычаан” оҕо уһуйаанын үлэһиттэрин тэрээһининэн полевой куукуна үлэлээтэ. Өрүү буоларын курдук, сылын аайы тэрилтэлэр уочаратынан эппиэтинэс сүгэллэр, бу сырыыга балыыһа уонна ветеринария сэрии сылын оҕолорун тэҥҥэ алтыһыннаран бырааһанньыгынан эҕэрдэлээн, толору астаах остуол тула олорон истиҥник ис дууһаттан кэпсэтэн дуоһуйа сынньанныларын хааччыйдылар.Мустубуттар махталлара муҥура суох .
Бу кэмҥэ Ньурба куоратыгар баар тыыл бэтэрээнигэр Алексеева Мария Апполоновнаҕа нэһилиэк дьаһалтатын аатыттан бырааһынньыгынан бэлэҕи биир дойдулаахпыт Иван Васильев туттарда, Дьокуускайга баар кырдьаҕаспытыгар Родионова Мария Михайловнаҕа «Чуукаар” түмсүү салайааччыта Вадим Тихонов уонна Михаил Кириллин туттардылар.Маны таһынан ИП Егоров В.С.” Арчы” маҕаһыын уонна ип Афанасьева Н.М “ДариЯ”маҕаһыын сэрии сылын оҕолоругар бородууктанан көмө оҥорон сүргэлэрин көтөхтүлэр.Кырдьаҕастар махталлара улахан.
Киэһэтин «Өйдөбүл төлөнө” аахсыйа чэрчитинэн, кыайыы иһин хорсуннук турууласпыт бэтэрээннэргэ өйдөбүнньүк истиэндэҕэ өйдөбүнньүк чүмэчилэри уурдубут.Е.М.Поликарпов аатынан “Эйгэ” НАК директора Ульяна Артемовна Иванова туруоруутунан “Өлбүттэр сүрэххэ тыыннаахтар” испэктээк дьон болҕойон көрдө. Оруолларга оскуола оҕолоро оонньообуттара ордук биһирэннэ.
Ыам ыйын 14 күнүттэн тааралаах бензин нэһилиэнньэҕэ атыыланыа. Интириэһиргээбит дьон дьаһалтаҕа Торохов Ярослав Валерьевичтыын билсиҥ.
«Чуукаар Нэһилиэгэ» МТ пресс киинэ