Өрөспүүбүлүкэ судаарастыбаннаһын күнүгэр Чуукаар нэһилиэгэр бэрт көхтөөх тэрээһин буолла. П.П.Иннокентьев аатынан култуура уонна сынньалаҥ пааркатын сөргүтүү өрөмүөнүн кэннэ арылынна.
Киириигэ кэлбит ыалдьыттары кулууп уус-уран салайааччыта Андрей Сивцев-Лэкээрин алгыһынан уруйдуу көрүстэ. Ол кэннэ үөрүүлээх чааһы нэһилиэк аҕа баһылыга Артур Юрьевич Фёдоров эҕэрдэ тылынан саҕалаата. Нэһилиэккэ ыытыллыбыт үчүгэй саҥа тутуулаах, элбэх араас үүнээйилээх олбуор күрэҕин түмүгүн таһааран кыайыылаахтарга наҕараадалары туттардылар. Владимирова З.С. — I , Саввинова Л.А. — II, Петрова М.Г. III бочуоттаах миэстэлэргэ тиксэн грамотаны таһынан харчынан бириэмийэлэннилэр.
Нэһилиэк урукку баһылыга Степанов Владимир Петрович эҕэрдэ тыл эттэ, биэс сыллаах үлэтин түмүгүн билиһиннэрдэ уонна нэһилиэк олохтоохторун саҥа талыллыбыт баһылыгы тула бары бииргэ өйөһөн, өйдөһөн үлэлииллэригэр ыҥырда. Эҕэрдэ музыкальнай нүөмэрдэр тэрээһини киэргэттилэр. Спорт үлэһиттэрин көҕүлээһининэн күргүөмүнэн хаалыктаах хаамыы буолла.
Түмүккэ кэлбиттэри барыларын олохтоох дьаһалта үлэһиттэрэ босхо кус миининэн күндүлээтэ.
Мустубуттар бары олус астынан махтанан тарҕастылар.
Надежда Казакова