Чуукаарга ааспыт нэдиэлэтээҕи сонуннар тустарынан кылгастык.
От ыйын 18 күнүгэр Ньурба оройуонун урбааны сайыннарар киин генеральнай дириэктэрэ Пан Михаил Маркович уонна СӨ Ньурбатааҕы салаатын «Мой бизнес» киин сэбиэдиссэйэ Никифоров Михаил Валентинович Чуукаарга кэлэн бэйэ дьыалатын тэриммит дьоҥҥо инники өттүгэр дьарыктарын сайыннарарга, олоххо киллэрэргэ, өҥөнү оҥорорго сүбэ-ама биэрдилэр. Бу эйгэҕэ улууспутугар үгүс киһи бэйэ дьыалатын арынан, нэһилиэнньэ өҥөнөн туһанара кэҥээн сайдыыга үлэ күүскэ барарын кэпсээтилэр.
Нэһилиэкпитигэр оскуола тутуута бара турар, саҥа хочуолунайын тутуутугар Ньурба оройуонун Олох-дьаһах коммунальнай хаһаайыстыбатын (ЖКХ) биригээдэтэ үлэлии сылдьар, акылаат түстэ.
Саха балаҕанын тутарга анаан бэлэмнэммит тутуу маһа тыырдарыллан хатарылла сытар.
Уу хонор икки сиринэн Стрижевскэй уулуссаҕа СПССК «Агроснаб» экскаваторынан Степанов Дьулустан Васильевич турбалары көмөн түһэртээтэ. СПССК «Агроснаб» салайааччытыгар Протопопов Алексей Николаевичка тиэхиньикэтин уларсан үлэлэппитигэр махтаныах эрэ тустаахпыт.
Чукар — Киров 2,5 км. усталаах суолу көннөрөр үлэтэ бу күннэргэ барар.
Бойуот быһыта уутун тута сытар, сорох сиринэн бысталаабыт, күһүн бөҕөргөтөр үлэ субуотунньуга барыаҕа.
Чааһынай дьиэлэри кииннэммит ититии ситимигэр холбуурга магистральнай турбаларын ыларга, олохтоох нэһилиэнньэни көҕүлүүр программанан (ППМИ) 2 мөл. 410 тыһ. солк. суумалаах уонна оройуонтан бүддьүөттэр икки ардыларынааҕы (ИМБТ) нөҥүө көрүллүбүт 1 мөл. 600 тыһ. солк. суумалаах үбүлээһиҥҥэ аукцион буола турар, от ыйын 31 күнүгэр түмүгэ биллиэхтээх. Лесная уонна Стрижевскэй уулуссалар чааһынай дьиэлэригэр төһө тиийэринэн магистральнай турбалар тардыллыахтара.
Почта дьиэтин өрөмүөнэ саҕаланна. Урбаанньыт Федоров Егор Прокопьевич ылсан үлэлиир.
«Чуукаар» түмсүү салайааччыта Тихонов Вадим Геннадьевич Дьокуускай куораттан Чуукаарга кэлэ сылдьар. Аҕа баһылык Артур Юрьевичтыын дэриэбинэ иһигэр үлэ барарын билистэ, олохтоох дьаһалтаҕа депутаттары кытары көрсүһүү оҥордо.
Ньурбатааҕы киин балыыһа кылаабынай бырааһынан Чурапчы улууһугар кылаабынай бырааһынан таһаарыылаахтык үлэлээбит Ксенофонтов Артем Михайлович ананан үлэтин саҕалаата.
Сыбаалка күрүөтэ сабыллан турар, олохтоохтор бөҕү тоҕоргутугар таһыгар куппаккаҕыт күрүөнү аһан сыбаалка иһигэр киирэн тоҕоргутугар иһитиннэрэбит.
Айылҕабытыгар харыстабыллаахтык сыһыаннаһыаҕыҥ, ыраастык тутуоҕуҥ.
Эбэ, Хампах күөллэригэр уонна өрүскэ ууга киирии, сөтүөлээһин бобуулааҕын туһунан туоһулуур бэлиэлэр ыйаммыттара.
«Чуукаар нэһилиэгэ» МТ дьаһалтатын пресс-сулууспата