Сэтинньи 7 күнүгэр Дьаархан уһуйаанын капитальнай өрөмүөн кэнниттэн үөрүүлээх арыллыыта буолла. Барыта бу үлэҕэ улууска алмаастан киирэр үптэн 38 мөл. солк. көрүллүбүтэ. 35 миэстэлээх уһуйааҥҥа күн бүгүн 29 оҕо сылдьар, 17 үлэһиттээх.
«Саҥа трубнай технологиянан сыбаайаҕа тутулунна. Бэйэтэ саҥа тутуу кэриэтэ. Дьаархаҥҥа эдэр ыаллар олохсуйан, оҕолонон, оҕолоро сылаас, сырдык, бары өттүнэн хааччылыылаах дьиэҕэ сылдьыахтарын наада.
Урукку бириэмэҕэ оскуолалары эрэ саҥардар эбит буоллахпытына, билигин уһуйааннары кытары программаҕа киллэриэхпит. 2017 сылтан саҥа үөрэх эйгэтин тутууларын, климатическай усулуобуйабытын учуоттаан, барытын сыбаайаҕа оҥоробут”, — диэн улуус баһылыга Алексей Иннокентьев бэлиэтээтэ.
Тутуу управлениетын салайааччыта Константин Иванов иһитиннэриитинэн бырайыагы 2021 сыллаахха саҕалаабыттар. Бастаан федеральнай бырагыраамаҕа кыттар былааннаах эбиттэр, ол эрэн оскуола-уһуйаан буолан кыайан хапсыбакка, оройуон үбүлээн, былырыыҥҥыттан үлэтэ саҕаланан, быйыл силигин ситтэ.
Бэдэрээтчит “Сахастрой-11” ХЭТ тэрилтэ кэмигэр хаачыстыбалаахтык үлэтин оҥорон туттарда.
В.Н.Иванов аатынан оскуола-уһуйаан саҥа дириэктэрэ Павел Александров Дьаархан оҕолоро бэйэлэрин кыахтарын туһанан үүнэллэригэр-сайдалларыгар, үчүгэй услуобуйа тэрийбиттэригэр улуус салалтатыгар, бэдэрээтчиккэ улахан махталын тиэртэ.
Түмүккэ уһуйаан билигин эркиннэрэ ойуута суох кураанахтар, онон мантан салгыы сыл бүтүүтэ улуус бюджетыттан харчы көрөн дизайнерскай өттүгэр көмөлөһүөхпүт диэн улуус баһылыга эппитин үлэһиттэр дохсун ытыс тыаһынан көрүстүлэр.
Лена Петрова