Олунньу 23 к. Аҕа дойдуну көмүскээччилэр күнүн чэрчитинэн Иван Галактионович Прокопьев — Банюкка, Софрон Русланович Григорьев — Һооппо сырдык кэриэстэригэр аналлаах өйдөбүнньүк баннер аһылынна.
Иван Галактионович, Софрон Русланович төрөппүттэрэ Галактион Данилович уонна Евдокия Ивановна Прокопьевтар, Светлана Афанасьевна Григорьева уонна чугас аймахтара, Дьаархан нэһилиэгин баһылыга Станислав Святославович Конощук, бырайыактыыр үлэҕэ уонна уопсастыбаннаһы кытта сибээскэ улуус баһылыгын солбуйааччыта Валерия Гаврильевна Владимирова, улуус дьаһалтатын Анал байыаннай дьайыы боппуруостарыгар сүрүннүүр исписэлииһэ Ньургуяна Васильевна Антонова, «Аҕа дойдуну көмүскээччилэр» фонда улуустааҕы координатора Александра Николаевна Захарова, Анал байыаннай дьайыы кыттыылааҕа, бэтэрээнэ Егор Николаевич Духов уонна интернационалист-буойун Алексей Васильевич Николаев уолаттарбыт ааттарын үйэтитэр өйдөбүнньүк баннеры арыйдылар.
Ийэ дойдуларын туһугар ытык иэстэрин толоро сылдьан, сэрии толоонугар дьоруойдуу охтубут уолаттарбыт Прокопьев Иван Галактионович, Григорьев Софрон Русланович сырдык мөссүөннэрэ хаһан да умнуллубатын, кэлэр кэнчээри ыччакка, кинилэр хорсун быһыылара холобур буола турдун.
«Ким да умнуллубат, туох да умнуллубат!»
Андриан Пахомов