Арассыыйа үтүөлээх тренерэ Артур Пахомов төрөөбүтэ 70 сылыгар анаммыт «Дьоһун олох оҥкуллара» испэктээк Ньурба күннэрин чэрчитинэн Саха тыйаатырыгар көһүннэ. Режиссер — Алгыс Макаров, сценарист — Нюргуяна Матвеева.
Ньурба тыйаатырын артыыстарын тэҥэ Антоновка театральнай студиятын иитиллээччилэрэ оонньоотулар. Испэктээк урукку олоҕу санатан, биһиги кэккэбитигэр баар уонна суох дьону көрдөрөн залга олорооччулары долгутта. Улахан история ситиһиилээхтик таҥылынна.
Режиссер, сценарист, артыыстар үлэлэрин үрдүктүк сыаналаан Артур Иннокентьевич Олимпиадаҕа тиийбит иитиллээччитэ, депутат Георгий Балакшин, улуус баһылыга Алексей Иннокентьев, Октябрьскай нэһилиэк баһылыга Семен Корякин, тыйаатыр уус-уран салайааччыта Юрий Макаров, Пахомовтар аймах, одноклассниктар, Антоновкалар түмсүүлэрэ наҕараадалары, бэлэхтэри туттардылар, Саха тыйаатырыгар махтаннылар.
А.И. Пахомов аатынан Олимпийскай резервэ боксаҕа спортивнай оскуолатын салайааччытын Максим Куприяновы сыанаҕа элбэхтэ ыҥырдылар. Улахан киһибит аата умнуллубатыгар Максим Аммосович сүдү өҥөлөөх.
Октябрьскай нэһилиэк пресс-киинэ