Улуус төрүттэммитэ 200 сылыгар аналлаах Дьокуускайга Ньурба күннэрин атыыта-эргиэнэ Өксөкүлээх Өлөксөй аатынан норуоттар доҕордоһууларын дьиэтигэр саҕаланна.
Үрүҥ ас, эт, бэйэ оҥоһуу аһа куорат дьонун, биир дойдулаахтарбытын угуйар, атыылаһааччылар кутулла тураллар. Тыа хаһаайыстыбатын департаменын салайааччыта Леонид Ушканов сарсыарда эрдэттэн тэрийиигэ, бэрийиигэ сылдьар.
Үөрбүт-көппүт атыылаһааччылары санааларын үллэстэргэ көрдөстүбүт, онтубут бэйэ киһитэ буолан биэрдэ. Тутууга үлэлээбит, архитектордаабыт, 2000 сылтан Дьокуускайга көһөн олорор Валентин Федоров Чуукаартан төрүттээх, Чаппандаҕа күтүөт. «Дойдубуттан атыы-эргиэн кэллэҕинэ куруук сылдьабын, эт, үрүҥ астан сүөгэй, арыы ылабын. 2015-16 сылларга маннык тэрээһиҥҥэ биэс киилэлээх Хорула арыытын сүүйбүттээхпин. Бүгүн эмиэ онтубун атыыластым», — диир Валентин Алексеевич.
Биир дойдулаахпыт бэҕэһээ өссө документальнай киинэ премьератыгар сылдьыбыт: «Үчүгэй киинэ, сөбүлээтим. Айылҕабытын, дьоммутун көрөн үөрдүм». Бу курдук дойдутугар төһө да сыл аайы кэриэтэ сырыттар, Ньурба тэрээһиннэригэр көхтөөхтүк кыттыһар, сэргиир дьоммут бу күннэр устата олус элбэх буолуохтаахтар. Валентин Алексеевич улуус 200 сылынан эҕэрдэлээтэ, ситиһиилэри баҕара хаалла.
Кооперативтар, бэйэ оҥорон таһаарааччылар, агрооскуолалар бородууксуйаларын улуус баһылыга Алексей Иннокентьев Кытайтан бырааттыы куораттан сылдьар ыалдьыттарга көрдөрдө, билсиһиннэрдэ. «Байар» дегустациятыттан амсайан ытык ыалдьыттар эрбэхтэрин өрө туталлар.
Улуус дьаһалтатын пресс-сулууспата