СӨ доруобуйа харыстабылын миниистирин бастакы солбуйааччыта Дмитрий Сергин Ньурбаҕа кэллэ. Саҥа дьыл бырааһынньыктарын иннинэ улуустааҕы киин балыыһа эбийиэктэрин уонна эмтиир балыыһа тутуутун көрөр-истэр соруктаах.
Дмитрий Сергин уонна улуустааҕы киин балыыһа кылаабынай бырааһа Артем Ксенофонтов улуус баһылыгын солбуйааччыта Наталия Петрованы кытта көрүстүлэр. Сүрүннээн доруобуйа харыстабылын үлэһиттэрин олорор дьиэнэн хааччыйыы, 2025 сылтан үлэтин саҕалыыр «Ньурба доктора» улуустааҕы тус сыаллаах бырагыраама туһунан кэпсэттилэр. Доруобуйа харыстабылын салайааччылара бу бырагыраамаҕа хабыллар медиктэр квоталара улаатарыгар, «Земский доктор» бырагыраамаҕа Ньурба куорат буолан медиктэр 2 мөл. солк. төлөбүргэ кыайан хапсыбаттарын учуоттаан, «Ньурба доктора» бырагыраамаҕа Ньурба куоракка үлэлии кэлэр быраастар эмиэ хабыллыахтарын баҕаралларын эттилэр. Улууска врачебнай амбулаториялары, ФАП-тар тутуу боппуруоһа эмиэ таарылынна. Дмитрий Сергин министиэристибэ иһинэн СВО кыттыылаахтара реабилитацияны, эмтэниини ааһалларыгар эппиэттээх салайааччы буоларын быһыытынан, бу боппуруос тула эмиэ кэпсэтии барда.
Салгыы миниистир бастакы солбуйааччыта Дмитрий Сергин уонна министиэристибэ каадыр отделын салайааччытын солбуйааччыта Елена Уарова бүгүн улуустааҕы киин балыыһа уонна кылаабынай быраас Артем Ксенофонтовы кыттта бииргэ, СВО кыттыылаахтарын оҕолоругар анаммыт утренникка кытыннылар уонна «Үтүө санаа харыйата» аахсыйа чэрчитинэн бэйэлэрэ 12 оҕоҕо Саҥа дьыллааҕы бэлэхтэри туттардылар.
Улуус дьаһалтатын пресс-сулууспата