Кулун тутар 20-21 күннэригэр Хорула нэһилиэгэр 17-с төгүлүн үлэ, тыыл, спорт бэтэрээнэ, РСФСР үөрэҕириитин туйгуна, Ньурба улууһун, Хорула нэһилиэгин бочуоттаах олохтооҕо, РФ Суруналыыстарын сойууһун чилиэнэ, Учууталлар учууталлара Егор Прокопьевич Федоров – Хорула Дьөгүөр кэриэһигэр тустууга уонна хапсаҕайга уолаттарга аһаҕас турнир буолан ааста. Хорула нэһилиэгин дьаһалтата, Ньурбатааҕы оҕо спортивнай оскуолата, Хорула олохтоохторо, Е.К.Федоров аатынан оскуола кэлэктиибэ — бары ылсан туран сылын аайы үрдүк таһымнаахтык тэрийэллэрэ үтүө үгэскэ кубулуйда. Аһаҕас турниры Ньурба оройуонун физическэй култуураҕа уонна спорка управлениета былааныгар киллэрэн тэрийистэ.
Хорула нэһилиэгин тустууга тренерэ Окоемов Роман Гаврильевич иһитиннэриитэ: «Кулун тутар 20-21 күннэригэр Ньурба улууһун уһук сытар Хорула нэһилиэгэр Хорула Дьөгүөр сырдык кэриэһигэр 17-с төгүлүн оҕолорго көҥүл тустууга уонна хапсаҕайга күрэхтэһии буолан ааста. Күрэхтэһиигэ Бүлүү, Үөһээ Бүлүү, Ньурба улуустарыттан барыта 110 оҕо кэлэн илин-кэлин түһүстэ. Икки күннээх күрэх түмүгүнэн 2014-2015 сс. т. уолаттарга чөмпүйүөн үрдүк аатын 24 кг Михайлов Ренат (Хорула), 28 кг Крацков Саян (Бүлүү), 32 кг Алексеев Женя (Хорула), 47 кг Никифоров Коля (Бүлүү) ыллылар. 2013 с. т. уолаттарга 24 кг Матвеев Дамир (Хорула), 26 кг Слепцов Ньургун (Ньурба), 35 кг Васильев Түмэн (Ньурба), 38 кг Степанов Самир (Үөһээ Бүлүү), 44 кг Анисимов Артем (Үөһээ Бүлүү) чөмпүйүөн үрдүк аатын ылары ситистилэр. 2010-2012 с. т. уолаттарга чөмпүйүөннэринэн буоллулар-36 кг Алексеев Эльдар (Хорула), 38 кг Осипов Эрсан (Хорула), 41 кг Иванов Кеша (Хорула), 48 кг Антонов Эльдар (Ньурба), 52 кг Николаев Ярик (Ньурба), 85 кг Николаев Юра (Хорула). 2006-2009 с. т. уолаттарга хапсаҕайдаһан тустууга 45 кг Николаев Эрхан (Хорула), 50 кг Филиппов Аян (Хорула), 55 кг Осипов Миша (Хорула), 62 кг Григорьев Андрей (Хорула), св. 62 кг Иванов Степа (Хорула) тэҥнээхтэрин булбатылар. Чемпионнарга анал курдар, мэтээл, грамота, бириистэр туттарылыннылар. Күрэхтэһии кэннэ хапсаҕайга муҥутуур кыайыылааҕы быһаарар хапсыһыылар саастарынан бөлөхтөрүнэн ыытылынна. Манна кыайыылаахтарынан Хорула орто оскуолатын үөрэнээччилэрэ Николаев Юра, Григорьев Андрей, Иванов Степа буоллулар. Уолаттар Е.П.Федоров –Хорула Дьөгүөр оҕолорун бирииһинэн, курунан наҕараадаланнылар.»
Е.П.Федоров –Хорула Дьөгүөр уола, Ньурбатааҕы техникум дириэктэрэ Андрей Егорович Федоров: “Аҕабыт, эһэбит Федоров Егор Прокопьевич-Хорула Дьөгүөр сырдык кэриэһигэр Хорула нэһилиэгэр быйыл уон сэттис төгүлүн уолаттарга аһаҕас турнир ыытылынна. Кыра саастаахтартан саҕалаан тустууга дьарыктанар уолаттар кытыннылар. Роман Гаврильевич Окоемов тренердии кэлиэҕиттэн Хорулаҕа тустуунан дьарыктанар оҕо элбээбитин уонна сайдыы баарын бэлиэтиэхпин баҕарабын. Күн аайы утумнаахтык дьарыктаналлара көстөр, маастарыстыбалара үрдээбит курдук, оҕолор баҕалаахтар, ситиһии үксээбит. Өрөспүүбүлүкэҕэ, Уһук Илиҥҥэ, Арассыыйаҕа тиийэ Хорула тустууктара кытталлар.
Оройуоммут иһигэр конкуренция үрдээбитэ биллэр, тустууга көрдөрүүлээх уолаттар элбээбиттэрэ олус үөрдэр. Уруккуттан кыттар хамаандалар кэлбиттэр, Үөһээ Бүлүүлэр, Бүлүүлэр, элбэх үчүгэй күөн көрсүһүүлэр буоллулар. Дьон да сылдьара элбээбит, төрөппүттэр оҕолорун батыһа сылдьаллар, спорка оҕолору сыһыарыы үксээбит. Ньурба оройуонун спорка оскуолата, Ньурба оройуонун физическэй култуураҕа уонна спорка управлениета өссө ылсан үлэлэһэр санаалаахтарын эттилэр. Аһаҕас турнир бары тэрийээччилэригэр, спонсордарыгар, тренердэргэ, Хорула нэһилиэгин дьаһалтатыгар, Е.К.Федоров аатынан оскуола кэлэктиибигэр, нэһилиэк олохтоохторугар, кыттааччыларга Егор Прокопьевич кэргэнин, оҕолорун, сиэннэрин аатыттан барҕа Махталбытын тиэрдэбит. Барыгытыгар кытаанах доруобуйаны, дьолу-соргуну, ситиһиилэри баҕарабыт!”
Мария Семенова