Кулун тутар 13 к. улуус элбэх оҕолоох эдэр ыалларыгар бэлиэ түгэн үүннэ. Сорохтор дьоро тэрээһиҥҥэ оҕолорун илдьэ кэлбиттэр. Улуус баһылыга Алексей Иннокентьев элбэх оҕолоох 7 эдэр дьиэ кэргэҥҥэ дьиэ ылалларыгар эбэтэр тутталларыгар социальнай төлөбүр сэртипикээттэрин туттарда. Кинилэр истэригэр Ньурба куорат, Хатыҥ Сыһыы, Сүлэ олохтоохторо бааллар, итинтэн 2 ыал – СВО кыттыылаахтарын дьиэ кэргэттэрэ.
Баһылык эҕэрдэ тылыгар РФ Бэрэсидьиэнэ Владимир Путин эдэр оҕолоох эдэр ыаллары өйөөһүнү приоритетнай хайысха быһыытынан тутарын, Саха сирэ демографическай бэлиитикэҕэ, оҕо төрөөһүнүгэр Уһук Илиҥҥэ инники күөҥҥэ сылдьарын бэлиэтээтэ. Ньурба улууһугар 4 сыл устата «Ньурба дьиэ кэргэнэ» ийэ хапытаала олохтонон үлэлээбитин, судаарыстыба өттүттэн дьиэ кэргэттэри өйөөһүҥҥэ элбэх бырагыраама баарын, көмө күүһүрбүтүн эттэ. Улуус Сүбэтин дьокутааттарын өйөбүлүнэн «Хаачыстыбалаах олорор дьиэнэн хааччыйыы» бырагырааманы ирээттэһэн үбүлээһиҥҥэ сыллата улуус бүддьүөтүттэн 10 мөл. солк. көрүллэр. Ону таһынан быйыл өрөспүүбүлүкэ бүддьүөтүттэн 239 тыһ. солк. уонна федеральнай бүддьүөттэн 3 мөл. 740 тыһ. солк. көрүллүбүт. Улууска 3 уонна итинтэн элбэх оҕолоох, 35-гэр диэри саастаах 103 эдэр ыал уочаракка турар. Алексей Иннокентьев Арассыыйа Бэрэсидьиэнигэр, СӨ салалтатыгар уонна улуус Сүбэтин дьокутааттарыгар истиҥ махталын анаата.
Судаарыстыба улахан көмөтүн ылан үөрэн күлүмүрдүү сылдьар дьиэ кэргэттэртэн Евдокия Андреевна харда махтал тылын эттэ. Ыал ийэтэ Евдокия Андреевна – улуустааҕы КИО-ҕа, ыал аҕата Анатолий Сергеевич Васильев «Саханефтегазсбыт» тэрилтэҕэ операторынан үлэлииллэр. 3 оҕолорун илдьэ кэлбиттэр.
«2019 с. эдэр ыаллары өйүүр бырагыраамаҕа уочаракка турбуппут. 2021 с. Антоновкаҕа ипотеканан дьиэ туттан киирэн олоробут. Эдэр ыалларга бу олус үчүгэй бырагыраама. Социальнай төлөбүр сэртипикээтин ипотекабытын сабарга туһаныахпыт. Улууспут баһылыгар А.М.Иннокентьевка уонна ИСУ-га улахан махталбытын тиэрдэбит», — диэн санааларын үллэһиннилэр.
Геннадий АНТОНОВ