Бэҕэһээ Төрөөбүт тыл уонна сурук-бичик күнүгэр Национальнай библиотека Оҕо ааҕыытын тэрийэр киинигэр Саха сирин суруйааччыларын сойууһун бэрэссэдээтэлэ, «Чолбон» сурунаал бас эрэдээктэрэ, поэт, публицист, тылбаасчыт Гаврил Андросов «Боотур буолуом» диэн уолаттарга аналлаах хоһооннорун саҥа кинигэтэ сүрэхтэннэ.
Кинигэ сүрэхтэниитин Оҕо ааҕыытын тэрийэр киин сүрүн библиотекара Тайаана Никифорова үүннээн-тэһииннээн ыытта. Кыттыылаахтарынан Екатерина Тарская учууталлаах «Айыы кыһата» национальнай гимназия 4-с «б» кылааһын үөрэнээччилэрэ буоллулар. Саха оҕотун тыа сирин кытта ситимин өбүгэ төрүт өйдөбүллэригэр уонна аныгы олох дьүһүлгэнигэр хоһуллубут хоһооннору үөрэнээччилэр олус сөбүлээбиттэр. Харахтара чаҕылыйан утуу-субуу хомуурунньукка киирбит айымньыны барытын өйдөрүттэн ааҕан чуопчаардылар. Оҕолор кылааһынан ырыа ыллаан ньиргиттилэр, кинилэр ортолоругар Т.Е. Сметанин, Я.В. Стручков «Мэхээлээн булчут кэпсээннэрэ» айымньыларынан матыыбынан Александр Лукин уста сылдьар киинэтигэр оонньообут уолчаан, саха суругун-бичигин аҕата С.А. Новгородов аймаҕа кыысчаан үөрэнэллэрин киэн тутта билиһиннэрдилэр.
Гаврил Андросов: «Суруйааччы диэн кимий?» –диэн ыйытыытыгар үөрэнээччилэр: «Хоһоон суруйар киһи», «Кини кэпсээни айар», «Суруйааччы –айар» диэн бэрт чобуотук хардардылар. «Хоһоон суруйар оҕо баар дуо?» диэн ыйытыытыгар кэнники кэккэҕэ олорор хас да кыыс айарга холоноллорун илиилэрин уунан биллэрдилэр. Ити курдук, алын сүһүөҕү быйыл түмүктүүр дьоһун оҕолор Төрөөбүт тыл уонна сурук-бичик күнүн умнуллубаттык бэлиэтээтилэр, суруйааччылыын атах тэпсэн олорон алтыстылар. Ыытааччы Тайаана: «Хайдах кинигэний?» диэн ыйытыытыгар уолаттар элбэх тыла суох эрбэхтэрин чороччу уунан астыммыттарын көрдөрдүлэр.
Бу – поэт Хабырыыс Ондороос оҕоҕо аналлаах бастакы кинигэтэ. Былырыын «Айар» кинигэ кыһатыгар 2000 ахсаанынан бэчээттэнэн тахсыбыта. Ойуутун-мандарын ааптар оскуолаҕа бииргэ үөрэммит доҕоро, куйаар ситимигэр биллэр худуоһунньук Николай Мочкин (Elleyart) оҥорбут. Кинигэ кыһатын үлэһиттэрэ этэллэринэн, бу хомуурунньук атыыга хамаҕатык баран бүтэн эрэр.
Туйаара Павлова