Бүгүн — өрөспүүбүлүкэ үрдүнэн бэлиэ күн: видеоконференц-сибээһинэн СӨ Ил Дархана Айсен Николаев өрөспүүбүлүкэҕэ 9 саҥа эбийиэги үөрүүлээхтик аста. Өрөспүүбүлүкэ улуустарыгар үлэҕэ киирэр саҥа эбийиэктээх тэрилтэлэр салайааччылара, ол иһигэр Хаҥалас нэһилиэгин Н.И.Кочнев аатынан оскуола-уһуйаанын дириэктэрэ Елена Антонова улаханнык үөрэн-долгуйан туран иһитиннэрии оҥордулар, өрөспүүбүлүкэ салалтатыгар истиҥ-иһирэх махталларын тиэртилэр. Үлэҕэ киирэр эбийиэктэр истэригэр Элгээйигэ врачебнай амбулатория, Томмокко Оҕо искусство оскуолата, Нам Хомустааҕар Анегина Ильина аатынан култуура дьиэтэ уо.д.а. бааллар.
Айсен Николаев быйыл өрөспүүбүлүкэҕэ 66 эбийиэк үлэҕэ киирбитин, Дьиэ кэргэн уонна Оҕо саас сылларыгар бүгүн аһыллар эбийиэктэр истэригэр Хаҥалас улууһун Төхтүрүгэр, Үөһээ Бүлүү улууһун Сургуулугар уонна Ньурба улууһун Хаҥалаһыгар оҕо уһуйааннара баалларыттан олус үөрэрин бэлиэтээтэ.
Аалай кыһыл лиэнтэни СӨ Үөрэҕин уонна наукатын министиэристибэтин наукаҕа, профессиональнай үөрэхтээһиҥҥэ уонна тус сыаллаах бэлэмнээһиҥҥэ департаменын салайааччыта Айаал Докторов, улуус баһылыгын солбуйааччыта Наталия Петрова, нэһилиэк баһылыга Серафим Винокуров, оскуола-уһуйаан дириэктэрэ Елена Антонова, «Стройгазсервис” гендириэктэрин солбуйааччыта Алексей Барашков уонна уһуйаан бэлэмнэнии бөлөҕүн иитиллээччитэ Динара Максимова быһа кырыйдылар. Тутааччыларга уонна бары көмөлөспүт дьоҥҥо элбэх истиҥ махтал тыллара ананнылар. Алексей Барашков өрөгөйдөөх ытыс тыаһын ортотугар оскуола-уһуйаан дириэктэрэ Елена Антоноваҕа оҕо уһуйаанын символическай күлүүһүн туттарда. Айаал Докторов оскуола-уһуйааҥҥа Ил Дархан аатыттан конструктор комплегын бэлэх уунна.
Хаҥаласка 35 миэстэлээх, сырдык-тупсаҕай дьиэ өрөспүүбүлүкэтээҕи Үтүө дьыала хамсааһынын чэрчитинэн тутулунна. Бастакы сыбаайата 2019 с. түһэриллибитэ, хас да бэдэрээтчит үлэлээн, кэлин Дьокуускайдааҕы «Стройгазсервис” ХЭТ (салайааччы Н.В.Климов) аукционынан бу үлэни ылан ситэрдэ. Бу нэһилиэккэ бастакы таас тутуу буолар. Мантан салгыы оҕо уһуйаанын дьиэтин дизайна оҥоһуллуохтаах. Саҥа киирбит уhуйаан дьиэтэ аныгы кэм ирдэбилигэр толору эппиэттиир тупсаҕай, сырдык, сылаас толору хааччыллыылаах. Итинэн кырачааннар оҕо саастара дьоллоохтук, үөрүүлээхтик ааһарыгар, манна эппиэтинэстээхтик үлэлии сылдьар уһуйаан кэлэктиибэ айымньылаахтык үлэлииригэр бэртээхэй усулуобуйа тэрилиннэ. Оҕо уһуйаана 2016 с. оскуолаҕа холбоһон, билигин «Хомусчаан» диэн ааттанан оскуола иннинээҕи бөлөх быһыытынан үлэлиир. 25 кырачаан сылдьар. Бэлиэ тэрээһиҥҥэ оҕолор чобуотук ыллаан, үҥкүүлээн төрөппүттэр сүрэхтэрин үөрүүнэн-дьолунан толордулар.
Бу дьоро күн бастыҥ үлэһиттэр наҕараадаларын туттулар. Иитээччи Айталина Баишева — Үөрэх уонна наука министиэристибэтин Бочуотунай грамотатынан, иитээччи көмөлөһөөччүтэ Надежда Васильева, асчыт Розалия Иванова, «Стройгазсервис» гендириэктэрин солбуйааччыта Алексей Барашков, «Стройгазсервис» ХЭТ учаастагын салайааччыта Максим Степанов министиэристибэ Махтал суругунан бэлиэтэннилэр.
Оҕо уһуйааныгар 40-ча сыл үлэлээбит бэтэрээн Елизавета Антонова: «Өр кэмҥэ ыра санаа буолбут күүтүүлээх уһуйааммыт дьиэтэ үлэҕэ киирэн олус үөрдүбүт. Уһуйааммытын СӨ Ил Дархана Айсен Сергеевич Николаев тус бэйэтинэн куйаар ситиминэн аспыта биһиэхэ олус үөрүүлээх уонна долгутуулаах.
Мин бастаан манна үлэлиирим саҕана эргэ дьыссаакка кирпииччэ оһоҕу отторбут. Онтон 1985 с. сопхуос күүһүнэн нэһилиэк Сэбиэтин бэрэссэдээтэлинэн Василий Додохов үлэлээн олордоҕуна уопсай дьиэ бырайыагынан уһуйаан дьиэтэ тутуллубута, онно эмиэ сүрдээҕин дьолломмуппут. Билигин саха киһитэ санаан тиийбэт ыра санаата туолла. Оҕону иитэн-үөрэтэн сайыннарарга бэртээхэй усулуобуйа тэрилиннэ, эдэр ыаллар элбэх оҕолонуохтарын наада диэн баҕа санаабын тиэрдэбин. Ил Дархаммытыгар Айсен Сергеевич Николаевка уонна улууспут баһылыга Алексей Михайлович Иннокентьевка, тутааччыларга муҥура суох махталлаахпыт. Нэһилиэгим олохтоохторугар бу үөрүүлээх, сырдык түгэнинэн истиҥ эҕэрдэбин тиэрдэбин!»
Геннадий Антонов