Сэтинньи 27 к. улуус Сүбэтин уочарата суох сиэссийэтэ ыытылынна. Бастакынан дьокутааттар улуус хонтуруоллуур уонна ааҕар-суоттуур палаататын бэрэссэдээтэлин боломуочуйата бүппүтүнэн сибээстээн, саҥа бэрэссэдээтэли таллылар. Улуустааҕы үп управлениетын салайааччыта Алена Семенова, хонтуруоллуур уонна ааҕар-суоттуур палата бэрэссэдээтэлинэн үлэлээн кэлбит Алексей Иванов кандидатуралара туруоруллубуттар. Кинилэр санааларын истэн баран, сиэссийэҕэ кэлэн кыттыбыт 12 дьокутаат кистэлэҥ куоластааһынан баһыйар үгүстэрэ (10 куолаһынан) Алена Семенованы таллылар. Дьокутааттар куоластааһын түмүгүн биир санаанан бигэргэттилэр.
А.И.Семенова үп эйгэтигэр 27 сыл, ол иһигэр үп управлениетыгар 20 сыл ыстаастаах уопуттаах үлэһит быһыытынан биллэр. 2004 сылтан үп управлениетын салайааччытын солбуйааччытынан, 2017 сылтан үп управлениетын салайааччытынан ситиһиилээхтик үлэлээн кэллэ.
2-с боппуруоһунан «Ньурба улууһун бочуоттаах олохтооҕо» бочуоттаах ааты иҥэриигэ быйылгы квотаны улаатыннарар туһунан боппуруос көрүлүннэ. Ааспыкка суруллубутун курдук, улуус бочуоттаах олохтооҕун аатын иҥэрии туһунан Балаһыанньа саҥа эрэдээксийэтэ 01.01.24 с. күүһүгэр киирэр уонна маннык ааты иҥэрии сылга иккитэ – улуус ыһыаҕар уонна Саҥа дьылга ыытыллар. Бу наҕараадаҕа элбэх сайаапка киирэ сытарынан уонна Арассыыйаҕа, СӨ-гэр, улууска бэлиэ тэрээһиннэрдээх сылларынан, СВО-нан сибээстээн, быйылгы квотаны 5 киһинэн улаатыннарарга, Саҥа дьылга 5 киһиэхэ улуус бочуоттаах олохтооҕун аатын иҥэрэргэ диэн улуус дьокутааттара куоластаан бигэргэттилэр.
Салгыы сиэссийэҕэ дьокутаат ыйытыгын формата уонна да атын боппуруостар көрүллэн дьүүллэһиннилэр.
Геннадий Антонов