Сылын аайы араас хайысхаҕа үчүгэй көрдөрүүлээх, ситиһиилээх оҕолорго ананар Ил Дархан Харыйата быйыл эмиэ ыытылынна. Саха сирин бүттүүнүттэн 700 оҕо Саха бриллиантовай Циркатын уораҕайыгар тоҕуоруһа муһуннулар. Биһиги Ньурбабыт улууһуттан манна 25 бастыҥ оҕо кыттыыны ылла. Оскуолалар активистара, үөрэх туйгуннара, спортсменнар талыллан бу үөрүүлээх тэрээһиҥҥэ кыттар чиэскэ тигистилэр.
Хаҥалас орто оскуолатын быйылгы 11 кылааһын 3 үөрэнээччитэ бары Ил Дархан Харыйатыгар кытыннылар. Бу кинилэр үөрэхтэригэр үчүгэйдэрин, көхтөөхтөрүн уонна ситиһиилээхтэрин туоһулуур. Адамов Олег кыра кылаастан үөрэх туйгуна, бастыҥтан бастыҥ, оскуоланы бүтэрэригэр кыһыл көмүс мэтээли ылаары былааннанар. Анжелина Жданова эмиэ үчүгэй үөрэхтээх, быйыл үрүҥ көмүс мэтээли ылыахтаах. Оһуохайы, тойугу толорор, фольклору өрө тутар. Онтон Васильев Краснослав кыра кылаастан «4», «5» сыанаҕа үөрэнэр көхтөөх уол. Кинилэр үөрэхтэригэр, спорка, оҕо хамсааһыныгар ситиһиилэрин таһынан, кыра кылаастан «Кэскил» хаһыаты кытары доҕордоһоллор. Дьоҕурдаах, көхтөөх, сытыы эдэр кэрэспэдьиэннэр. Анжелина Жданова «Кэскил» хаһыат “Бастыҥ Эдкор” аатын ылбыта. Олег Адамов сайын Москваҕа бүтүн Арассыыйатааҕы «Юнкор» медиа форумҥа кыттыбыта. Кини оскуолаттан туйгун үөрэнээччи буолан, онтон Краснослав уонна Анжелина Ил Дархан харыйатыгар “Кэскил” хаһыат анал ыҥырыытынан сырыттылар.
Бу маннык хас биирдии оҕоҕо бэлиэ, кэрэ, умнуллубат түгэн биһиги оҕолорбутугар тосхойбута олус долгутуулаах уонна үөрүүлээх. Хас биирдии Ил Дархан Харыйатыгар сылдьыбыт оҕо бу тэрээһини умнуо суоҕа уонна инникитин дойдутугар туһалаах, ситиһиилээх киһи буоларыгар төһүү буолуоҕа.
Жданова Наталия,
«Ыллык» пост