Мин Айсен Сергеевич Николаев быйылгы туһаайыытын син эмиэ өрөспүүбүлүкэбит бары олохтоохторун тэҥэ болҕойон сэргээн иһиттим. Тыа сиригэр олорор, үлэлиир буолан бастатан туран, тыа хаһаайыстыбатын өйөөһүҥҥэ көрүллэр үп сыл аайы эбиллэрин сэҥээрдим.
Ааспыт сылга ыытыллыбыт үлэ көрдөрүүлэрэ үрдүк таһымнаахтара үөрдэр, аны кэнники сылларга куораты эрэ буолбакка тыа сирин кытта газтааһын олохтоохтор олорор усулуобуйаларын тупсарыыга төһүү буолуо.
Хаарбах дьиэттэн көһөрүү бырагыраамата биир кэлимсэ олоххо киириитэ бүгүҥҥү күн ирдэбилэ. Холобур, биһиги нэһилиэкпит хаарбах туруктаах дьиэлэрэ докумуоннанан олохтоохтор уочараттарын күүтэллэр. Онон бырагыраама тохтоон хаалбакка, киин да уһук да нэһилиэктэри тэҥҥэ хабан үлэлииригэр баҕалаахпыт.
Оҕону үөрэтэр-иитэр эйгэҕэ үлэлиирим быһыытынан оҕоҕо сыһыаннаах этиилэргэ болҕомтобун уурдум. Ол курдук оҕо барахсан сылаас, дьоллоох биһигэ дьиэ кэргэн буоларынан кини олоҕун уйгута өйөбүл үбүнэн эбиллиитэ үчүгэй, оттон оҕолорбут төрөөбүт төрүт тылларынан саҥарар буолуулара бу киһи быһыынан өй-санаа өттүнэн үүнэн-сайдан тахсыытын бастакы олуга. Онон бу үлэ өрөспүүбүлүкэ үрдүкү салалтатын болҕомтотугар сылдьара киһини үөрдэр уонна омук быһыытынан сүтэн-симэлийэн хаалбаппытыгар эрэли үөскэтэр.
Венера Степанова,
Күндээдэ