Бу нэдиэлэҕэ биир дойдулаахтарбыт, Ил Түмэн сис кэмитиэттэрин бэрэссэдээтэллэрэ Владимир Прокопьев уонна Георгий Балакшин улууспутугар кэлэн үлэлии сылдьаллар. Бастакы күн кинилэр Дьиикимдэ, Сүлэ, Антоновка уонна Ньурба к. олохтоохторун кытта көрүстүлэр.
Ахсынньы 4 к. «Кыталык» КД дьоҕус саалатыгар 17 чаастан дьокутааттары кытта көрсүһүүгэ Ньурба куорат 60-ча олохтооҕо кытынна. Мунньаҕы Ньурба куорат баһылыга Геннадий Игнатьев иилээн-саҕалаан ыытта. Владимир Прокопьев уонна Георгий Балакшин өрөспүүбүлүкэ бүддьүөтүн, Ил Түмэн сис кэмитиэттэрин, улуус туруорсуулаах боппуруостарынан ыытар үлэлэрин туһунан иһитиннэрии оҥордулар. Куоначчаан муостатын тутуутун үбүлээһин, Ньурбаҕа стадион тутуутугар үбү корректировкатыгар, Орто Түҥнээҕи гаастаах сиртэн Ньурба улууһун нэһилиэнньэлээх пууннарын гаастааһын, оһохтоох дьоҥҥо субсидия уо.д.а. боппуруостарга хайдах үлэлэһэ сылдьалларын сырдаттылар.
Саалаҕа мустубут элбэх дьонтон үгүс ыйытыы киирэн хоруйданна. Сүрүннээн дьэллик ыттары бэрээдэктииргэ өрөспүүбүлүкэ сокуонун түргэнник ылынар наадатын, газгольдер көмөтүнэн гааһынан сылыттыыга субсидия олохтонуутун, үрдүк күүрүүлээх уот, маһынан оттуллар оһохтоох ыалларга субсидияны үрдэтии, киин ититиигэ холбонуу, каадыр боппуруоһун – быраастар уонна учууталлар тиийбэттэрин, экология уо.д.а. боппуруостары көтөхтүлэр.
Дьокутааттар ыйытыыларга толору хоруйдары биэрдилэр. Онтон аҕыйах түгэҥҥэ тохтоотоххо, дьэллик ыт боппуруоһугар боломуочуйалары эрэгийиэннэргэ биэрбиттэр, Ил Түмэҥҥэ өрөспүүбүлүкэ сокуонун бырайыага бэлэмнэнэ сылдьар, кэлэр сыл олунньу ыйыгар көрүллэрэ былааннанар. Газгольдер көмөтүнэн гааһынан сылыттыыны киллэрии кэҥээн иһэринэн, манна субсидия боппуруоһун быһаарыахха сөп, ол иһин манна сүбэлэһии ыытыллыахтаах. Оһоҕунан сылыттыыга субсидия кырата биллэр, этэҥҥэ буоллаҕына субсидия кээмэйэ үрдүөхтээх уонна оһохтоох дьиэлээх киһи барыта ылыахтаах, дьокутааттар бу боппуруоска өссө үлэлэһиэхтэрэ. Уотунан хааччыйыыга кыһалҕа элбэхтэр, инньэ гынан Владимир Михайлович «Якутскэнерго» ПАО гендириэктэрэ Геннадий Алексеевы улууска аҕала сылдьан кэпсэтиэхтэрин иһитиннэрдэ. Быраас тиийбэт кыһалҕатын быһаарар инниттэн, Мединститут саҥа дьиэтин тутуутун уонна устудьуоннар ахсааннарын элбэтэр туһунан боппуруоһу туруорбуттар.
Улуустааҕы киин балыыһа кылаабынай бырааһа Наталья Павлова тус сыаллаах дуогабарынан улуустан быраас идэтигэр үөрэнэр дьонтон сорохторо үөрэхтэрин бүтэрэн баран дойдуларыгар кэлбэттэрин, дьиэ-уот уонна үлэ булунан куоракка олохсуйа хаалалларын эттэ, дуогабардаах 3 сылларын кэлэн үлэлиэх тустаахтарын тоһоҕолоото.
Кэпсэтиигэ улуус Сүбэтин бэрэссэдээтэлэ Нюргуяна Михайлова, «Байар» кэпэрэтиип толорооччу дириэктэрэ Надежда Филиппова, Социальнай фонда улуустааҕы салаатын салайааччыта, улуус Сүбэтин дьокутаата Владимир Моисеев, Ньурба куорат Сэбиэтин бэрэссэдээтэлэ Петр Иннокентьев уо.д.а. кытыннылар. Көрсүһүү түмүктэниитэ Ил Түмэн дьокутааттара үөрэх эйгэтигэр тэрилтэлэригэр туттарарга анаан улуустааҕы үөрэх управлениетыгар бэйэлэрин бэлэхтэрин туттардылар.
Владимир Прокопьев уонна Георгий Балакшин бу нэдиэлэ устата улуус нэһилиэктэригэр барытыгар сылдьаллар. Улууспут олохтоохторун мунньахтарга көхтөөхтүк кэлэн кыттан Ил Түмэн дьокутааттарыгар бэйэҕит санааҕытын, туруорсууларгытын тиэрдэргитигэр ыҥырабыт.
Геннадий Антонов