От ыйын 22 күнүгэр улуус баһылыга Иннокентьев Алексей Михайлович Чуукаарга тахсан олохтоохтору уонна салайаччылары кытары көрсүстэ. Кинини кытта тыа хаһаайыстыбатын департаменын салайааччыта Леонид Ушканов, Инвестиционнай тутуу управлениетын салайааччыта Константин Иванов, дьаһалта социальнай отделын сүрүннүүр исписэлииһэ Павел Александров, «Сэттэ» тутуу тэрилтэтин салалтата буолан сырыттылар.
Бастаан Чуукаар оскуолатыгар таарыйан быйылгы үөрэх дьылыгар бэлэмнэрин билистилэр. Чуукаар 6 кылааһын үөрэнээччилэрэ быйыл Бурятия республикатыгар остуол тенниһигэр сбордана барбыттар эбит. Онон профессиональнай теннис остуолун атыылаһарга боппуруос турбут.
Салгыы тутулла турар оскуоланы баран көрдүлэр. Тутуу матырыйаала барыта кэлбит, кэлэр ый саҥатыгар Үөһээ Бүлүүгэ кэлэн сытар матырыйаал сорҕотун паромунан аҕалыахтара.
2020 с. эдэр исписэлиистэргэ анаан тутуллубут 4 квартиралаах дьиэни көрөн, эбии радиатордар туруохтара уонна тутууну ыыппыт бэдэрээтчит цоколын өрөмүөннүөхтээх диэн эттилэр.
Оттуур ходуһалары кэрийдилэр. Быйылгы от былаана Чуукаарга 1700 т, итинтэн 230 т хаһаайыстыбалар киэннэрэ. Бүгүҥҥү туругунан 9% оттоммут.
Хаххырыар бүтүннүү ууга сытар. Моҕотой Ньылатыгар Даниловтар сылы толору үлэлиир тыа хаһаайыстыбатын техникатын сапчааһын атыылыыр маҕаһыыны туруорсаллар. Василий Никитиһи, Васильевтар дьиэ кэргэттэрин көрсөн кэпсэттилэр. Сылгы төрөөһүнэ быйыл мөлтөх диэн отчуттар этэллэр. От хаачыстыбата мөлтөҕүттэн буолуон сөп дииллэр. Быйыл үчүгэй хаачыстыбалаах оту ылар инибит диэн эрэнэллэр.
Киэһэ нэһилиэк көхтөөх олохтоохторун кытары көрсүһүү буолла, олохтоохтор махтаннылар уонна маннык боппуруостары туруордулар: оттуур сирдэр уу аһардар ханаалларын ыраастаныыта, дулҕа быһар тэрил атыылаһыыта.
Лена Петрова