Бэҕэһээ Ньурбаҕа СӨ норуоттарын IX Спортивнай оонньууларын тэрийэр хамыыһыйа сүбэ мунньаҕын салайан ыыттым.
Бу туһунан улуус баһылыга А.М.Иннокентьев бэйэтин Телеграмыгар суруйда.
Улууспут олоҕор-дьаһаҕар, инники сайдыытыгар улахан суолталаах тэрээһин буолара 2 сылтан эрэ ордук кэм хаалла. Ньурба өрөспүүбүлүкэ киин спортивнай түһүлгэтэ буолар кэмигэр 6 тыһ. тахса киһи кэлэрэ күүтүллэр.
Бэлэмнэнии үлэтэ ыытылла турар, Артур Янович Яковлев салайааччылаах СӨ норуоттарын IX Спортивнай оонньууларын дириэксийэтэ тэриллибитэ. Саамай тутаах суолталаах хайысханан тутуу үлэтэ буолар.
Ньурба к. 3000 миэстэлээх, сүүрэр манежтаах стадион уонна бассыайыннаах Физкултуурунай-чэбдигирдэр комплекс (ФОК) тутуутугар аукционнар ыытыллан, кыайыылааҕынан «Сэттэ» тутуу фирмата таҕыста. Стадион тутуутугар муниципальнай хантараак түһэрсилиннэ, аны ФОК-ка муниципальнай хантараак илии баттаныаҕа.
«Бизнес-спринт» федеральнай бырайыагынан Чаппандаҕа модульнай спорт комплексын тутууга уонна өрөспүүбүлүкэтээҕи Үтүө дьыала хамсааһынын чэрчитинэн Күндээдэҕэ спорт саалатын иккис түһүмэҕэр аукционнар түмүктэрэ сотору биллиэҕэ. Сүлэҕэ спорт саалатын тутуу боппуруоһун быһаарса сылдьабыт.
Артур Яковлев Уус Алдаҥҥа буолан ааспыт СӨ норуоттарын Спортивнай оонньууларга уонна Тааттаҕа аны сайын буолар Манчаары оонньууларыгар хайдах быһыылаахтык бэлэмнэнии үлэтин ыыппыттарын билиһиннэрдэ, сүрүн соруктарга, хайысхаларга тохтоото.
Хамыыһыйалар бэрэссэдээтэллэрин иһитиннэриилэрин истэн дьүүллэстибит. Нэһилиэктэри тупсаран оҥоруу, ол иһигэр аншлагтарын саҥардыы, ыалдьыттары көрсүү уонна аһатыы, «сувенирнай уулуссаны» тэрийии, эбийиэктэри өрөмүөннээһин, култуурунай тэрээһиннэргэ аппаратуранан хааччыллыы уо.д.а. элбэх тэрээһин боппуруостарын ырытыстыбыт.
Аныгыскы мунньахтарга хамыыһыйалар салайааччыларын отчуоттарын истиэхпит.
«Ньурба» хаһыат