Олунньу 25 күнүгэр В.А.Петрова аатынан Ньурбатааҕы улуустар икки ардыларынааҕы Кырдьаҕастар уонна инбэлииттэр дьиэлэригэр Галина Федорова салайааччылаах «КөмүсКэл» иистэнэр сыах волонтердара бэйэлэрин үлэлэрин илдьэ кэлэннэр сиһилии кэпсээтилэр.
«КөмүсКэллэр» ураты ис хоһоонноох уопсастыбаннай хамсааһын буолан өрөспүүбүлүкэ таһымыгар тиийэ биллэр. Бастаан анал байыаннай дьайыыга кытта сылдьар уолаттарбытыгар көмө буолуо этибит диэн ийэлии толкуйунан аҕыйах киһилээх түмсүүттэн саҕалаабыт буоллахтарына, билигин кинилэр кэккэлэрэ хаҥаан, соруктара үрдээн улуус, өрөспүүбүлүкэ таһымыгар дойдуга бэриниилээх буолуу үтүө холобура, иистэн саҕалаан ыччаты патриоттыы тыыҥҥа иитиигэ методическэй киин таһымыгар таҕыстылар.
КөмүсКэллэр сатаабатахтара суох. Саллаат уолаттары таҥаһынан хааччыйалларын таһынан, уран иистэрин ааҕан сиппэккин. Кинилэр паннолара Ильмень күөл сиригэр тиийэ көрдөрүүгэ турбуттара элбэҕи этэр. Аны ырыалара-тойуктара, кыраҕа-кыаммакка көмөлөрө… киһи сөҕөр эрэ.
Кырдьаҕастар уонна инбэлииттэр кинилэри илэ көрөн, кэпсэтэн олус сэргэхсийдилэр, махтал тылларын КөмүсКэллэргэ тиэртилэр .
Ньурбатааҕы улуустар икки ардыларынааҕы Кырдьаҕастар уонна инбэлииттэр дьиэлэрин пресс-сулууспата