«Дьүрүскэн» ансаамбыл 2022 сыллаахха С.П.Гаврильев аатынан «Тойук» норуот айымньытын дьиэтин иһинэн тэриллибитэ. Салайааччылара Герасимова Клара Артуровна уонна Винокурова Венера Юрьевна. Ансаамбылга нэһилиэк үөрэх уонна култуура тэрилтэлэрин үлэһиттэрэ бааллар, уопсайа уончалар. Бу ансаамбыл сахалыы үстүрүмүөҥҥэ доҕуһуоллатан норуот ырыаларын, чабырҕаҕы толорон көрөөччүлэр биһирэбиллэрин тута ылбыттара.
«Дьүрүскэннэр» араас күрэхтэргэ, нэһилиэк култуурнай олоҕор көхтөөхтүк кытталлар. Ол курдук кэккэ ситиһиилээхтэр:
«Дьүрүскэн куолас» VII-с төгүлүн ыытыллар норуот ырыаларын күрэҕэ 36 үөһээ саастаах дьон икки ардыгар бастакы үрдэл.
«Бриллиантовые нотки» XI аан дойдутааҕы фестиваль-конкурс «Фольклор» номинацияҕа I степеннээх лауреат, Дьокуускай к.
Ньурба оройуонугар «Үлэ, эйэ, түмсүү» Өрөгөй ыһыаҕын чэрчитинэн ыытыллар Социалистическай үлэ геройа Михаил Федорович Алексеев 95 үбүлүөйдээх сылыгар «Уруйдуоҕуҥ Үлэ киһитин!» норуот ырыаларыгар күрэскэ I үрдэл 18-35 саастаахтарга.
«Айар саас» оройуоннааҕы фестивалга 35-тэн 50 сааһыгар диэри «Фольклор» анал аакка лауреат (муус устар 15 күнэ, 2023 с.).
Үлэ кэннэ киэһэ кулуупка кэлэн дьарыктаналлар, таҥастарын тиктэллэр. Ырыаларын-тойуктарын уопсай сүбэнэн талан-үөрэтэн ыллыыллар. Инникитин даҕаны күрэхтэргэ, саҥа хардыыларга кыттыахпыт диэн баҕа санаалаахтар, эрэллээхтэр.
«Дьүрүскэн» ансаамбылга ситиһиилэри, саҥа дабайыылары, чэгиэн туругу, бары үтүө баҕа санааларгыт туолалларын баҕарабын.
С.П.Гаврильев аатынан «Тойук» норуот айымньытын дьиэтин дириэктэрэ
Степанова Е.С.