«Киэҥ эйгэ аартыгынан кэрэни тиһэн..» кинигэ сүрэхтэниитэ

Ахсынньы 6 күнүгэр Бордоҥ нэһилиэгэр «Маалыкайдааҕы оҕо искусство оскуолата»

айымньылаах айар аартыгын арыйан, үгүс кэнчээри ыччаты кэрэҕэ уһуйан үлэлээбитэ 50

сыллаах үбүлүөйүн үөрүүлээх күнүгэр «Киэҥ эйгэ аартыгынан кэрэни тиһэн..» кинигэ
сүрэхтэниитэ буолан ааста.

Кинигэни оҥорон таһаарыы олус үлэлээх, түбүктээх буолар. Ханнык баҕарар
матырыйаал хомуллан кинигэ буолан таҕыстаҕына өлбөт – сүппэт үйэлэнэр. “Сурукка
киирбит суоруллубат,” – диэн мээнэҕэ этиллибэт. Бу кинигэ “Маалыкайдааҕы оҕо
искусство оскуолатын” үлэһиттэрин көҕүлээһиннэринэн таҕыста, хомуйан оҥордулар:
А.Т.Типянова, И.В.Макарова, Л.И.Яковлева, М.Н.Тихонова. “Типография – Нюрба”
типографиятыгар 172 страницалаах, 50 ахсаанынан бэчээттэнэн таҕыста. Кинигэҕэ араас
сылларга үлэлээбит, үөрэммит дьон ахтыылара киирдилэр.

Бу тэрээһин оскуоланы кытта быстыбат ситимнээх, ахтылҕан иэйиитин сүгэн, истиҥ
санаа кустугар куустаран, көрсүһэр түгэн үөрүүтүн үллэстэ, эдэр сааһы эргитэ, ааспыты
ахта-саныы, кэрэ кэпсээн кэһиилээх кэлэр кэми кэрэһэлии кэлбиттэрэ көстөр. Ол курдук
Дьокуускай куораттан урут үлэлээн ааспыт Васильева Мария Степановна, Спиридонова
Розалия Яковлевна, Ильина Дария Ильинична, Потапов Афанасий Дмитриевич, Намтан
Никифоров Владимир Васильевич күндү ыалдьыттарынан буоллулар. Маны сэргэ
“Ньурбатааҕы оҕо искусство оскуолатын” директора Николаев Илья Николаевич уонна
уһуйааччылара Евсеева Елизавета Романовна, Саввинова Наталья Иннокентьевна,
Алексеева Татьяна Николаевна кэлэннэр истиҥ эҕэрдэлэрин тиэртилэр.

Маалыкайдааҕы Кэрэ эйгэтин оскуолата өр сыллар устата таһаарыылаахтык үлэлээн,
элбэх оҕо искусства кэрэ эйгэтин аспыт, нэһилиэк, оройуон, өрөспүүбүлүкэ киэн туттар
дьонун иитэн таһаарбыт, дириҥ силистээх – мутуктаах оскуоланнан биллэр. Оскуола
бастаан үлэлиир сылларыгар фортепиано уонна байаан салааларыгар эрэ үөрэппит
буоллаҕына, билигин Маалыкай, Хатыы, Малдьаҕар нэһилиэктэриттэн оҕолор уһуйуллан
фортепиано, уруһуй, фольклор, үҥкүү, ырыа салааларыгар үөрэнэллэр.

Искусство оскуолата оҕону сырдыкка – кэрэҕэ уһуйар үөрэх кыһата буолар. Хас биирдии оҕо бэйэтин
кэмигэр бириэмэтин куоттарбакка эрэ бу оскуола үөрэҕин ааһыахтаах. Манна үөрэммит
оҕо үөрэҕин таһынан дьарыктаах буолар, кэрэ эйгэҕэ сыстар уонна бириэмэни сөпкө
туһалаахтык туттарга үөрэнэр. Ону таһынан араас күрэхтэргэ кыттан, атын сирдэргэ
сылдьан сайдар, олус элбэх доҕордонор, интэриэһинэй дьону кытта билсэр.

Саҥа кинигэни билиһиннэрии үөрүүлээх тэрээһин саҕаланыытыгар улаханнык
убаастанар, тумус туттар, култуура эйгэтигэр уопсайа 40 сыл үлэлээбититтэн 36 сылын
Маалыкай оҕо музыкальнай оскуолатыгар анаабыт, ол иһигэр 27 сыл директорынан үрдүк
таһаарыылаахтык үлэлээбит, Маалыкай музыкальнай оскуолата, нэһилиэк оҕолоро,
ыччаттара сайдыылаах, үрдүк култууралаах дьоһун дьон буола улааталларыгар ахсаабат
кыһамньытын ууран сүҥкэн кылаатын киллэрэн далааһыннаах үлэни тэрийбит, СӨ
култууратын туйгуна, СӨ Правительствотын стипендиата, «СӨ норуот айымньытыгар
кылаатын иhин», «Ньурба оройуонун култууратын сайдыытыгар кылаатын иһин» бэлиэлэр
хаһаайына, Бордоҥ нэһилиэгин бочуоттаах олохтооҕо, үлэ бэтэрээнэ Любовь Ивановна
Саввинова олус дириҥ ис хоһоонноох ахтыы оҥордо.

Ньурба оройуонун култуураҕа салаатын салайааччытын солбуйааччыта Николаева
Ньургуяна Викторовна уонна Бордоҥ нэһилиэгин олохтоох дьаһалтатын баһылыга
Степанов Прокопий Юрьевич кинигэ сүрэхтэниитигэр үйэ аҥаардаах үбүлүөйдэринэн ис
сүрэхтэриттэн үөрэн долгуйан туран истиҥ эҕэрдэлэрин тиэртилэр. Эдэр талааннары
иитэн өссө таһаара туралларыгар, үтүө ситиһиилэрдээх үрдүк чыпчаалга көтөн үүнэ-сайда,

чэчирии туруҥ диэн баҕа санааларын эттилэр.

Кэлбит ыалдьыттар, выпускниктар,төрөппүттэр кинигэ дири ис хоһооннооҕун бэлиэтээтилэр.

Саҥа тахсыбыт кинигэ үүнэр көлүөнэни кэрэ эйгэтигэр иитиигэ, үөрэтиигэ улахан
суолталаах буолара саарбаҕа суох.

Кэрэ эйгэтин оскуолата
Кэрэ төрүүр төлкөлөөх биһигэ,
Кэнчээри ыччаты үөрэтиигэ
Кэскиллээх, айымньылаах үлэ
Кэҥии-тупса турдун!

Маалыкай олохтоох модельнай бибилэтиэкэ