Киһи кэрэхсиир кэрэмэс дьоно

Быйыл дойдубутугар Дьиэ кэргэн сыла, Сахабыт сиригэр Оҕо саас сыла биллэриллэн ыалы өйүүр дьаһаллар, дьиэ кэргэн олоҕо бигэ буоларыгар холобур буолар ыаллары сырдатыы күүскэ бара турар. Бүгүн кэпсиэхтээх ыалбыт Федоровтар дьиэ кэргэн аҕа баһылыга Миитэрэй Куонаанабыс  Федоров саха биир дьоһун-мааны ыалын туллар тутааҕа, тумус киһитэ эрэ буолбакка, бар дьон туһугар үйэтин тухары үрүлүй-харылыйа үлэлээбит, онон өрөспүүбүлүкэтин сайдыытыгар сэмэй кылаатын киллэрбит киһи буолар.

Итини кини үрдүк аата — СӨ тыатын хаһаайыстыбатын үтүөлээх үлэһитэ, СӨ тыатын хаһаайыстыбатын туйгуна, СӨ “Гражданскай килбиэн” бэлиэ хаһаайына, үлэ, тыыл бэтэрээнэ, СӨ ытык кырдьаҕаһа, олохтоох суолталаах персональнай пенсионер,  Мэҥэ-Хаҥалас улууһун уонна Бэдьимэ нэһилиэгин бочуоттаах олохтооҕо, Ньурба улууһун муниципальнай тэриллиитин сайдыытыгар кылаатын иһин анал бэлиэ хаһаайына, Ньурба улууһун уонна Хорула нэһилиэгин бочуоттаах олохтооҕо – ырылыччы туоһулуур. Бу буолар — киниэхэ бар дьонун, төрөөбүт дойдутун билиниитэ уонна үрдүк сыанабыла, кэннигэр хаалларар үтүө аата.

Миитэрэй Куонаанабыс – үлэтинэн, тус олоҕунан толору дьоллоох киһи. Быйыл самаан сайын үгэнигэр сүһүөҕүн үрдүгэр сүүрэ-көтө сылдьан 90 сааһын көрүстэ. Ыччаттарын тэрийиитинэн бу сааһын кини хаҥыл хаҥаластар киин куораттарын аттыгар баар аатырар «Нараада» туркомплекска бэлиэтээтэ. Дьоро күҥҥэ төрөөбүт-төлөһүйбүт Хорулатын, Ньурбатын, үлэһит уонна ыал буолбут Чурапчытын, салайааччы буола үүммүт Мэҥэ-Хаҥалаһын, Дьокуускайын ааттара ытык киһибит араас кэмнэргэ салайар үлэлэргэ утумнаах үлэтинэн, өрөспүүбүлүкэбит сайдыытыгар киллэрсибит кылаатынан бэлиэтэнэн, Өлүөнэ Эбэ киэҥ дуолугар элбэхтэ дуорайда, махталлаахтык ахтылынна.

Улуу эбэ доллоһутар киэҥ көстүүтүгэр дьүөрэлии Миитэрэйбит киэҥ-холку, сэмэй олоҕун кэрэ кэрчиктэрэ кэлбит дьоҥҥо кэһии курдук кэпсэннэ, ытыска уурардыы, сиһилии сэһэргэннэ: хаһан эрэ үрэх баһыгар Хорула нэһилиэгин Ураһалаах түбэтигэр оттуур ходуһа ортотугар төрөөбүт биир оҕо, биир киһи, биир аҕа, биир эһэ, биир эр киһи – олоҕун устатыгар көрсүбүт ыарахаттара уонна олору туорааһына, үүнэн-сайдан, үлэһит, салайааччы, ыал-күүс буолуута бүттүүнэ. Куонаанабыс түөрт кыталык кыргыттара, сиэн ыччаттара дьиэ кэргэттэринээн биир биир парадтаан киириилэрэ, бэйэлэрин постановкаларыгар представлениелара, ытык киһилэрин олоҕун кэрэһилиир документальнай видеофильмнара, флешмобтара, кэлбит дьон кэпсээннэрэ, тотоойу баай сандалылара уо.д.а. барыта ис киирбэх, истиҥ уонна аҕаҕа, эһэҕэ, ытык киһиэхэ махтал, таптал тыынынан илгийэр дьоһун тэрээһин.

Үөрүү-көтүү, эҕэрдэ өрөгөйдөөх чааһыгар Миитэрэй Куонаанабыска СӨ тыатын хаһаайыстыбатын үтүөлээх аата туттарылынна. Комсомол, советскай, партийнай үлэ бэтэрээнэ, САССР Үрдүкү Сэбиэтин бэрэссэдээтэлинэн, Мэҥэ-Хаҥаласка Миитэрэй Куонаанабыс Дьоруой Попов аатынан сопхуоска дириэктэрдиирин саҕана райком председателинэн үлэлээбит, билигин СӨ Ытык кырдьаҕастарын Сүбэтин салайааччыта Люлия Николаевна Григорьева “маннык үтүөлээх аат иҥэриллиитэ — бу улахан чиэс” диэн бэлиэтээтэ. Олоҕун эрэллээх аргыһа, араҥаччылыыр аанньала Мария Афанасьевна доҕорун бу дьоллоох сааһыгар кыранан тиийбэтэҕэ хомолтолоох…

Бу дьоһун ыалы кытта алтыспытым син балачча кэм буолла. Ол тухары Федоровтар олоххо тардыһыыларын күүһүн, ыраас, сырдык энергияларын, барыга көхтөөхтөрүн, бигэ көрүүлээхтэрин сөҕөбүн. Кинилэр олоҕу муоһалыыр, сайыннарар, иилиир-саҕалыыр үтүөкэн дьоҕурдаахтар. Ол майгылара барытыгар көстөр: дьиэлэригэр, оҕолоругар, олорор куораттарыгар, төрүт сирдэригэр-уоттарыгар ураты тапталлаах, айымньылаах сыһыаннарыгар. Мария Афанасьевна баарына кинилэри киин куоракка Ньурбаттан төрүттээхтэр, хорулалар, чурапчылар уонна үлэлээбит тэрилтэлэрин ыһыахтарыгар бэйэлэрэ сиэдэрэйдээн оҥорбут ураһалаах, дэлэгэй шатердаах, таҥастан аттарыллан тигиллибит балаҕаннаах, араас олбохтордоох, саламалардаах түһүлгэ киэргэтиитин туруоран, киэргэтэ-симии сылдьалларын, биитэр, саҥа тахсыбыт кинигэни билиһиннэриигэ, театрга, онтон да атын кэрэхсэбиллээх тэрээһиннэргэ кытта, биһирии-кэрэхсии сылдьалларын көрүөххэ сөбө. Билэрбинэн, куоракка ыытыллар ньурбалар ыһыахтарыгар кинилэр көмөлөрүнэн Хорула түһүлгэтэ, бэчээт үлэһиттэрин уопсай ыһыахтарыгар “Саха сирэ” хаһыат түһүлгэтэ куоталаһыыга хаста да кыайыылаах буолбуттара.

Мария Афанасьевна – олоххо айымньылаах сыһыаннаах, араас үтүө дьарыктаах, туохтан да иҥнэн-толлон турбат, чахчы да баһаатай майгылаах туруу дьорҕоот киһи этэ. Тыа балыыһаларыгар, куорат уонна өрөспүүбүлүкэ суолталаах балыыһаларга былдьаһыкка сылдьар медсестра этэ. Остуола өрүү толору астаах-үөллээх, тиэргэнэ сибэкки эгэлгэтэ, оҕуруота дэлэйэ, ииһэ-күүһэ, сатабыла — мээнэ ыал ийэтэ тэҥнэспэт хоһууна буолара. Сорох суоппарга бэриллибэт суоппар, массыынаны талбытынан ыһан-хомуйан кэбиһэр түргэн туттунуулаах маастар этэ диэн үөлээннэхтэрэ ахталлар. Чурапчы көһөрүллүүтүгэр аас-туор олох кыһарҕанын этинэн-хаанынан билэн улааппыт киһи өрүү көмөлөһө-өйүү сылдьар үтүө майгылааҕа, сэргэх сэһэннээҕэ. Ийэлэрэ баарына “кыһыл көмүс сыбаайбаларын» түөрт кыталык кыргыттарынаан, сиэн ыччаттарынаан, аймах-билэ дьоннорунаан бэлиэтээбиттэрэ…

Оттон Миитэрэй налыччы туттунуулаах, лоп-бааччы көрүҥнээх, наллаан кэпсэтэрин сөбүлүүр, сөхтөҕүнэ биитэр сэргээтэҕинэ, ис-иһиттэн үөрэн, сирэйдиин сырдаан турар буолар. Олохтоох толкуйдаах, ырааҕы эҥсэн барыллыыр-анаарар, дьоҥҥо тылын сатаан тиэрдэр, ылыннарар, үөскүүр кыһалҕалары туоратыыга бигэ быһаарыылары тобулар буолан, өр сылларга салайар-тэрийэр үлэҕэ үлэлээтэҕэ.

Федоровтар Дьокуускай куоракка бэйэлэрэ олорор Автодорожнай уокуруктарын, куорат мээрийэтин актыбыыстарынан биллэллэрэ-көстөллөрө. Дэлэҕэ даҕаны саҥастарын Мария Афанасьевнаны куоракка олорор хорулалар киэн туттан, сөҕөн, Мээрийэ Маарыйа диэн ааттыахтара дуо?… Кинилэр Бүлүүлүүр суол аартыга туох да бэлиэтэ, оҥоһуута суох диэн үчүгэй бэлиэни, сквери оҥорууну туруорсаннар, ону мээрийэ өйөөн, «Бриллиантовай сэргэ” диэн дьоһун стеланы уонна сквери туппуттара, куорат олохтоохторо таптаан сылдьар, айанньыт тохтоон ааһар кэрэ миэстэтинэн буолбута. Итинтэн да атын араас тэрээһиннэрэ бүгүҥҥэ диэри эдэр ыалларга, ыччаттарга үтүө холобур буолаллар.

Төһө да тулаайах хааллар, учуутал убайа Егор Кононович, Аканаҕа начаалынай оскуола сэбиэдиссэйэ, Миитэрэйи оскуолаҕа бастакы кылааска киллэрэн үөрэттэрбитэ. Салгыы 1953 с. Ньурба 1 нүөмэрдээх орто оскуолатын кэнниттэн Омскайга тыа хаһаайыстыбатын институтун 1958 с. кыһыл дипломунан ученай-агроном идэлээх бүтэрбитэ.

Эдэр уол Чурапчыга үлэлии барыыта инники үлэтин, бүтүн олоҕун дьоллоох түөрэҕинэн буолбута. Миитэрэй Чурапчыга тыа хаһаайыстыбатын инспекциятын кылаабынай агрономунан саҥа ананан үлэлии тиийэригэр бу эмчит идэлээх, сэрии саҕана Кэбээйигэ көһөрүллүүгэ сылдьыбыт бэйэтигэр дьүөрэлии тулаайах Мария Портнягина диэн бэрт сытыы-хотуу, чобуо кыыһы сөбүлүү көрбүтэ. Икки тулаайахтар 1961 сыллаахха холбоспуттара.

Ити оройуоннар, холкуостар холбоһуулара, бөдөҥсүйүүлэрэ, онтон аҕыйах сылынан арахсыылара бара турар кэмигэр түбэспитэ. Агроном үлэлииригэр олус куураайы сирдээх Чурапчыга оройуон кылаабынай агрономунан, «30 тыһыынчалаахтар» ыҥырыынан Сылаҥҥа, Мугудайга, Одьулууҥҥа старшпй агрономунан, онтон Ленин аатынан колхуос бэрэссэдээтэлин солбуйааччынан, иккистээн оройуон кылаабынай агрономунан Чурапчы сирин-уотун баһыттан атаҕар диэри арсыыннаабыта. 60-с сыллар саҥаларыгар уһун-кураан сылларга ыраах-чугас оройуонннарга баран оттооһуну, ыһыы иэнигэр биирдии культуранан түһэр былааны толорууну тэрийии, севообороту тутуһуу, ыраас паарга ыһыы, суортаммыт сиэмэнэн олордуу уо.д.а. курдук агротехническэй ирдэбиллэри олоххо киллэрии, тыаны солотон бааһыналары оҥорторуу курдук балысхан үлэлэргэ элбэх сыратын уурбута. Чурапчы «Украинатыгар» Одьулууҥҥа 1000  туонна батар механизированнай ыскылаат өрөспүүбүлүкэҕэ аан бастакынан тутуллубута. «Натааһа Чараҥа»  диэн 400 гектар иэннээх бааһына гектарыттан 18-20 центнер бурдук хомуллан, ханна баппакка, самосвалынан ыалларга күүспүтүнэн сүөкэттэрэн турабыт”, — дин ахтар Миитэрэй Куонаанабыс.

Чурапчы, Таатта оройуоннарын уунан хааччыйыы боппуруоһугар 60-с сыллар бүтүүлэригэр Миитэрэй Федоровы Наукалар академияларын Саха сиринээҕи филиалыгар Дьокуускайга ыытаннар, научнай үлэнэн дьарыктаммыта. Сири нүөлсүтүү, иһэр уунан хааччыйыы үлэтин себестоимоһа үрдүк буолан бу оччолорго кыаллыбатаҕа.  Салгыы кини 1970 с-ха Минсельхоз бирикээһинэн Мэҥэ-Хаҥалас оройуонун Герой Попов аатынан сопхуос дириэктэрин солбуйааччынан, онтон сирэй дириэктэринэн алта аҥар сыл устата ситиһиилээхтик үлэлээбитэ. Оройуон сири кытта үлэҕэ хаалыылаахтар ахсааннарыгар этэ. Куонаанабыс наука, уопут бастыҥ холобурдарыгар тирэнэн, интенсивнэй технологияны, хортуоппуйга, бурдукка идэтийбит механизированнай звенолары тэрийиигэ, кииннээһини, сиэмэ хаачыстыбатын тупсарыыга үлэлэри былааннаахтык олоххо киллэриитэ түмүктээх буолбута. Звенолар үрдүк үүнүүнү ылан, өрөспүүбүлүкэҕэ аатырбыттара. Герой Попов аатынан сопхуос бары үлэҕэ бастыҥ көрдөрүүлэнэн 1972 с. САССР Бочуотунай грамотатынан, САССР Бочуотун кинигэтигэр киллэриинэн наҕараадаламмыта, 1976 с. оройуон сопхуостарын ортолоругар кыайан, аан маҥнай көһөрүллэ сылдьар Кыһыл Знамяҕа тиксибитэ. Миитэрэй Куонаанабыс Чурапчыга, Мэҥэ-Хаҥаласка бииргэ үлэлээн ааспыт дьонугар-сэргэтигэр махтала муҥура суох: “Бары – биир киһи курдук, биир киһи – барыбыт туһугар” диэн бииргэ үлэлээн ааспыт хаарыан дьоммунан киэн туттабын”, — диир.

Кэлин бу сопхуоска Миитэрэй Федоров 2,5 сыл устата босхоломмут партком секретарынан быыбардаммыта. Салгыы кинини 1976-1985 с.с. партия обкомугар тыа хаһаайыстыбатын отделыгар партийнай үлэҕэ анаабыттара. Тоҕус сыл өрөспүүбүлүкэ таһымыгар уопутун, үлэҕэ тэтимин өссө күүһүрдэн, сири кытта үлэҕэ эрэ буолбакка, тыа сирин кэлимсэ сайдыытыгар улахан болҕомтотун уурбута.Пенсияҕа тахсарын чугаһыгар Дьокуускайдааҕы тыа хаһаайыстыбатын научнай чинчийэр институтун генеральнай директорын хаһаайыстыбаннай чааска солбуйааччынан үлэлээбитэ. 1989 с. пенсияҕа тахсыбыта эрээри, 2001 с. диэри араас тэрилтэлэргэ вахтерунан үлэлээбитэ.

Куонаанабыс төрөөбүт-үөскээбит Хорулатын өрүү өйүү-көмөлөһө сылдьар мааны майгытынан күн бүгүн сүбэ-соргу тута олорор. Партия обкомугар үлэлиир сылларыгар (1976-1985 с.с.) Хорулаҕа Чуукаарынан үрдүк күүрүүлээх электролиния тардыллыыта ыыра ыраатар туруктаммытыгар тыа хаһаайыстыбатын министрин капитальнай тутууга солбуйааччыта Ю.Д.Трофимовка боппуруоһу сулбу быһаарарыгар кытаанах партийнай дьаһал бэриллэрин ситиһэн, Хорулаҕа үрдүк күүрүүлээх электролиния кэмигэр киллэриллибитэ, угут дьыллар турбуттарыгар Хорулаҕа «Якутмелиоводстрой» трест салалтатын нөҥүө ууну түһэриини тус хонтуруолугар ылан, Ньурбатааҕы ПМК күүһүнэн Хорулаҕа ходуһа, мэччирэҥ сирдэрэ ууттан түргэнник босхоломмуттара, онтон да кыра-улахан боппуруостарга өйөбүл-тирэх буолуута улахан көмө этэ.

Дьэ ити курдук, хаһааҥҥыта эрэ тулаайах хаалбыт бу оҕолор барахсаттар үүнэн-сайдан, үлэһит бэрдэ буолан, Ньурба, Чурапчы, Мэҥэ-Хаҥалас дьонугар-сэргэтигэр ытыктанар ыал, тумус туттар бас-көс дьон буолуулара – чахчы холобур буолар дьоһун олох. Кэрэмэс киһи кэрэтик кырдьар дииллэрэ оруннаах.

 

Елена Иванова,

СӨ култууратын үтүөлээх үлэһитэ, бэчээт туйгуна

 

Читайте дальше