Муус устар 5 к. СӨ култуураҕа уонна духуобунай сайдыыга миниистирэ Афанасий Ноев Ньурбаҕа култуура үлэһиттэрин уонна норуот маастардарын кытта көрүстэ.
Афанасий Иванович Сунтаар уонна Бүлүү улуустарынан үлэ чэрчитинэн көрө-истэ сылдьарын эттэ. Култуура эйгэтигэр барар үлэни-хамнаһы, Ньурба улууһун уонна нэһилиэктэрин, кини үлэһит дьонун туһунан санааларын үллэһиннэ. Марха улууһа тэриллибитэ 200 сылыгар Култуура уонна духуобунай сайдыы министиэристибэтэ араас тэрээһиннэргэ өйөбүл буоларын, 2027 с. Ньурбаҕа СӨ норуоттарын 7-с Спортивнай оонньууларын култуурунай тэрээһиннэригэр өрөспүүбүлүкэ өттүттэн күүс-көмө буолуохтарын иһитиннэрдэ.
Миниистир Дьиикимдэ нэһилиэгин «Төлөн» ансаамбылын салайааччыта Николай Иванович Фокиҥҥа «СӨ култууратын туйгуна» бэлиэни үөрүүлээх быһыыга-майгыга туттарда. Улуустааҕы култуура департаменын салайааччыта Розалия Тихонова Ньурба улууһун култууратын туһунан өлүүкэ санааларын үллэһиннэ.
Кэпсэтиигэ Дархан уус Владимир Саввинов, Дьиикимдэ баһылыга Прокопий Осипов, Хорулатааҕы норуот айымньытын дьиэтин дириэктэрэ Наталья Степанова, Күндээдэ нэһилиэгин баһылыга Яков Замятин, Октябрьскай нэһилиэк баһылыга Семен Корякин туруорсууларын тиэртилэр.
Көрсүһүү түмүктэниитэ Афанасий Ноев СӨ Олоҥхо института приложение оҥорон өрөспүүбүлүкэ ийэ олоҥхоһуттара тыыннаах толорууларын устубуттара харалла сылдьарын култуура департаменыгар бэлэх быһыытынан туттарда.
Розалия Михайловна Афанасий Ивановичка улуустааҕы култуура үлэһиттэрэ бэлэмнээн таһаарбыт кинигэлэрин уонна харысхалы бэлэх уунна. Сиһилии бу көрсүһүү туһунан улуус хаһыатын кэлэр нүөмэригэр ааҕыаххыт.
Геннадий Антонов