Атырдьах ыйын 3 к. Ньурбаҕа Куочай детдомун 80 сылыгар аналлаах тэрээһиннэр ыытылыннылар. Ыраахтан-чугастан манна кэлэн иитиллэн олох киэҥ аартыгыр үктэммит дьон уонна детдом үлэһиттэрин, иитиллээччилэрин удьуордара бэлиэ түгэн үөрүүтүн үллэстэ муһуннулар.
Куочай детдомун бастакы дириэктэрэ, САССР үтүөлээх учуутала М.М.Таюрскай уонна ситиһиилээх үлэлэринэн дьон-сэргэ ытыктабылын ылбыт детдом иитиллээччилэрэ, улуус баһылыгын солбуйааччытынан үлэлээбит Р.И.Федоров, поэт Н.И.Харитонов-Чуор, суруйааччы С.П.Федотов, СӨ кылаабынай шеф-повара И.И.Тарбахов, сахалартан бастакы гражданскай авиация летчига С.Н.Васильев, Убайаан оскуолатын бэтэрээн учууталлара А.Д.Михайлова, Н.К.Михайлов, А.О.Акимов уо.д.а. ааттара иһирэхтик ахтылынна.
Эҕэрдэ тылы улуус баһылыгын солбуйааччыта Н.С.Петрова, бу бэлиэ тэрээһин тэрийсээччитэ, Үөһээ Бүлүү улууһун бочуоттаах олохтооҕо, СӨ култууратын үтүөлээх үлэһитэ А.П.Дмитриева, Бүлүү улууһун РЭС-ин бочуоттаах үлэһитэ С.П.Нестерович, Москваттан анаан-минээн кэлбит Ньурба улууһун бочуоттаах олохтооҕо, доруобуйа харыстабылын бэтэрээнэ С.И.Васильева, биллиилээх көрбүөччү, суруйааччы, «Экстрасенс» Якутии» бастакы куонкурус кыайыылааҕа, «Жди меня» Бүтүн Арассыыйатааҕы биэрии кыттыылааҕа, СӨ Адвокатскай палаататын адвоката М.Д.Николаева (Большакова)-Санаайа эттилэр. Детдом иитиллээччилэрэ истиҥ-иһирэх ахтыы оҥордулар, билигин даҕаны үөлээннээхтэрин кытта ыкса сибээһи тутуһалларын, үөрүүлээх да, хомолтолоох даҕаны түгэннэргэ бииргэ буолалларын, өйөһөллөрүн иһитиннэрдилэр.
Туһааннаахтарга улуус баһылыгын Эҕэрдэ суруктара туттарылыннылар. Тэрээһин кыттыылаахтара СӨ Бастакы Бэрэсидьиэнэ М.Е.Николаевка анаммыт быыстапка аһыллыытыгар кытыннылар, түмэл устун экскурсия тэрилиннэ. Куочай детдомугар сыһыаннаах дьоҕус быыстапкаҕа көрдөрүүгэ ууруллубут архыып докумуоннара дьон кэрэхсэбилин тарта. Салгыы Куочайга детдом турбут сиригэр сэргэ туруоруллуута сиэрэ-туома ыытылынна, детдом иитиллээччилэрэ оҕо саастара ааспыт ахтылҕаннаах сирдэринэн сылдьан астынан, көй салгынынан дуоһуйа тыыннылар. Үбүлүөйдээх тэрээһин Антоновка балаҕаныгар баай култуурунай бырагырааманан түмүктэннэ.
Сиһилии «Ньурба» улуус хаһыатын кэлэр №-гэр ааҕыаххыт.
Геннадий АНТОНОВ.
Ааптар уонна Ньурба түмэлин хаартыскалара.