🛤🏞 2017 сылтан Арассыыйаҕа «Тупсаҕай куорат эйгэтин үөскэтии» федеральнай бырайыак уонна «Олорор дьиэ уонна куорат эйгэтэ» нацпроект олоххо киллэриллэр. Бу федеральнай бырайыак сыала-соруга – дьон маассабайдык сынньанар сирдэрин уонна уопсай дьиэлэр тиэргэннэрин тупсаран оҥоруу буолар. Үп-харчы куонкурус түмүгүнэн кэлэр буолан, куонкуруска кыайыылааахтары быһаарарга дьон-сэргэ санаата учуоттанар. Онон нэһилиэнньэ көхтөөх кыттыыта быһаарар оруоллаах. Ааспыт сылларга Ньурба куоракка Сергей Васильев аатынан пааркабыт уонна Ленин болуоссатыгар «Набережнай» бырайыага федеральнай куонкуруска эрэллээхтик кыайан, үбүлээһиҥҥэ тиксэн оҥоһуллан тураллар. Бэйэтин кэмигэр бу бырайыактарынан күүстээх-күүрээннээх куоластааһыннар ыытыллыбыттарын өйдүүбүт.
Бу ый устата 2025 с. саҥардыллан оҥоһуллар уопсастыбаннай территориялары быһаарарга куйаар ситиминэн Бүтүн Арассыыйатааҕы куоластааһын ыытылла турар. Онно Ньурба куорат Степан Васильев уулуссатын саҥардан оҥоруу бырайыага баар. Билиҥҥитэ улууспут дьоно, Ньурба куорат олохтоохторун куоластааһыннара сэмэй дииргэ тиийэбит. Ортоку да кирбиигэ тиийэ иликпит. Муус устар 9 к. сарсыарда 9 чаастааҕы туругунан өрөспүүбүлүкэ бырайыактарын ортотугар баар-суоҕа 23-с миэстэҕэ сылдьабыт. 966 киһи куоластаабыт.
Хайа, 3 сылынан Ньурбаҕа СӨ норуоттарын IX Спортивнай оонньуулара ыытыллыа турдаҕа. Маннык улахан таһымнаах тэрээһиҥҥэ куораппыт тупсан-саҥардыллан тиийэригэр биһиги бары даҕаны интэриэстээх инибит буолбаат?! Ама, хайа киһи олорор түөлбэтэ, дойдута үчүгэй буолуон баҕарбатай. Федеральнай бүддьүөттэн үп көрүллүүтэ баһаам көмө буоллаҕа. Онон бары көхтөөхтүк куоластаан түһүнэн биэриэҕиҥ диэн ыҥырабыт!
Ньурба к. Уопсастыбаннай эйгэлэрин сайыннарар дириэксийэ салайааччыта Саргылана Седалищева: «Рейтинговай күрэххэ дьон көхтөөхтүк куоластаатаҕына, үрдүк көрдөрүүүнү ситистэхпитинэ эрэ элбэх үп көрүллэн бырайыакпыт олоххо киириэҕэ. Таҥара дьиэтиттэн «Туймаада» эргиэн дьиэтигэр диэри киин уулуссабыт бырайыага оҥоһулунна. Тротуар, бэлисипиэтинэн сылдьар суол, саҥа уотунан сырдатыы, Чусовской аатынан сквер, Степан Васильев аатынан болуоссат, эргэ «Юнион» кинотеатр уонна уруккута артыыстар уопсай дьиэлэрин оннугар сынньанар сирдэр саҥардыллан оҥоһуллуохтара. Эрдэ маннык куоластааһын түмүгэр Сергей Васильев аатынан пааркабыт уонна «Набережнай» бастакы түһүмэҕэ оҥоһуллан, дьон-сэргэ сөбүлээн мустар, сынньанар миэстэлэригэр кубулуйдулар.
Бырайыакка бассаабынан эбэтэр Телеграмынан кэлбит сигэнэн (ссылканан) эбэтэр Госуслуги киирэн куоластыахха сөп.
Для голосования:
https://14.gorodsreda.ru/page/about?yqrid=EKE8tG0j5sO
По ссылке через госуслуги https://pos.gosuslugi.ru/lkp/fkgs/
Геннадий Антонов