Олохтоох дьаһалта, нэһилиэк депутаттарын Сэбиэтин, выпускниктар үбүлээһиннэринэн «Антоновка оскуолата» таһаарыы уон биирис кинигэтэ балаҕан ыйын 9 күнүгэр сүрэхтэннэ. Уруккуну санатан кыһыл хаалтыстаах оҕолор оскуола ааныгар ыалдьыттары көрүстүлэр, учууталлар пионер Знамятын киллэрдилэр, Антоновка пионериятын историятын кэпсиир монтаж аахтылар, “Уоланнар” кылаастара ылбаҕай ырыаларынан киэргэттилэр.
Улууспут төрүттэммитэ 200, СӨ пионериятын 100 сылларыгар аналлаах «Пионерия, комсомол — оҕо саас чаҕылхай түмсүүлэрэ» кинигэ презентацията буолла. Кинигэни оҥорон таһаарааччылар олохторун үөрэҕириигэ, иитиигэ анаабыт СӨ үөрэҕириитин туйгуна, учууталлар учууталлара Светлана Васильевна Егорова, РФ үөрэҕириитин бочуоттаах үлэһитэ, улуус үөрэҕин бочуоттаах бэтэрээнэ Прасковья Михайловна Захарова. Саҥа таһаарыы 67 сыллаах историяны хабар, 9 тиһиктээх, 482 лиистээх, 120 устууканан таҕыста.
Светлана Васильевнаҕа уонна Прасковья Михайловнаҕа Ил Түмэн ыччат бэлиитикэтигэр сис кэмитиэтин Бочуоттаах грамоталара, СӨ пионериятын 100 сыллаах үбүлүөйдээх мэтээллэрэ, улуус, нэһилиэк дьаһалталарыттан, үөрэх управлениетыттан, оскуолаттан, бэтэрээн пионер баһаатайдартан, «Ньурба эрэлэ» түмсүүттэн, «Дьүөгэлиилэр» ырыа ансаамбылыттан, бары ыалдьыттартан эҕэрдэ, махтал суруктар, бэлэхтэр туттарылыннылар. Нэһилиэк баһылыга Семен Корякин Светлана Васильевнаҕа «За вклад в социально-экономическое развитие Октябрьского наслега» бэлиэни түөһүгэр ииллэ.
Аныгы олоххо суох ааспыт үйэ көстүүлэрэ, күндү түгэннэрэ, идеологията маннык бэриниилээх дьон баар буолан үйэтитилиннэ. «Будь готов! Всегда готов!» диэн өйдөбүллэрин илдьэ сылдьар көлүөнэ үлэтэ ситиһиилээхтик түмүктэммитинэн эҕэрдэлиибит!
Октябрьскай нэһилиэк дьаһалтатын пресс-киинэ.
Кыһыл хаалтыстаах кэми үйэтитэн кинигэ сүрэхтэннэ
