М. В. Мегежекскэй аатынан Маалыкай орто оскуолатыгар ДОЦ «Кымыс» стационарнай лааҕыр базатыгар, Мондоку диэн кэрэ айылҕалаах сиргэ 1 сезоҥҥа 22 оҕону хабан, «Дьоҕур» лааҕыр бэс ыйын 15 күнүттэн от ыйын 5 күнүгэр диэри үлэлээтэ.
«Дьоҕур» лааҕыр 90-с сыллартан тэриллэн, математикаҕа дьоҕурдаах оҕолору сүүмэрдээн, олимпиаднай суокка бэлэмниир, логическай толкуйу сайыннарар, ону таһынан эт-хаан өттүнэн чэбдигирдэр сыаллаах үлэлиир.
Лааҕырга 5-7 кылаас оҕолоро дьарыктаналлар. Оҕо толкуйдуур дьоҕурун сайыннарар араас математическай дьарыктар, оонньуулар ыытылыннылар. Ону таһынан лааҕырга «IT КЛУБ», «Айар дьоҕур», «Мас-игра», «Атах оонньуулара» кружоктарга оҕолор сөбүлээн дьарыктаннылар. Манна кинилэри лааҕыр үлэһиттэрэ — ДьПК физкультура салаатын устудьуона Айыллаана Попова, информационнай технология колледжын устудьуона Рустам Сергеев, олимпийскай резервэ училищетын устудьуона Николай Андреев, детсад үлэһиттэрэ Моисеева И. И., Спиридонова Н. Н. дьарыктаатылар. Лааҕыр начальнига математика учуутала Семянова С. В., медик Иванова С.Е., повар Спиридонова Н. П., ырааһы хааччыйар үлэһит Егорова С. А. оҕолор сынньалаҥнара туһалаахтык ааһарыгар бары кыһамньыларын ууран туран үлэлээтилэр.
«Сардаҥа» детсад үлэһиттэрэ кэлэн оҕолорго мас оонньууларыгар үгэскэ кубулуйбут «Сардаҥа оонньууларын» тэрийэн ыыттылар. Барыта 12 көрүҥҥэ күрэхтэстилэр. Оҕолор олус көхтөөхтүк кыттан бириис, грамота ылан кыайыы үөрүүтүн биллилэр.
«Время первых» оҕо-ыччат хамсааһынын программатынан патриотическай оонньуулар ыытылыннылар. Бырааттыы Донскойдар ааттарынан Малдьаҕар музейын көрөн оҕолор астынан кэллилэр. СВО-ҕа сылдьар саллааттарга сурук суруйдулар, журавлик оҥордулар. Эдэр корреспонденнарбыт ону барытын видеорепортаж оҥорон нэһилиэнньэҕэ сырдаттылар.
Оҕолор сайыҥҥы сынньалаҥнарын бэрт туһалаахтык атаардылар.
Анастасия Григорьева