Ахсынньы 17 күнүгэр Марха (Ньурба) улууһа төрүттэммитэ 200 сылыгар аналлаах Дьокуускай куоракка ыытыллар Ньурба күннэрин тэрээһиннэрин чэрчитинэн СӨ култууратын Үтүөлээх үлэһитэ С.С. Егоров-Оһоокой Сэмэн «Күн Тэгиэримэн Бухатыыр» олоҥхо-испэктээгэ СӨ үүнэр көлүөнэ тыйаатырын үрдүк сыанатыгар сүрэхтэннэ.
Ньурба дьоно-сэргэтэ, талааннаах оҕолоро, саха норуотун киэн туттуутун, ЮНЕСКО шедеврынан билиниллибит саха Олоҥхотун бүттүүн өрөспүүбүлүкэ таһымыгар, биир дойдулаахтарыгар, ыалдьыттарга, саха дьонугар көрдөрдүлэр.
Бырайыак ааптара — СӨ култууратын үтүөлээх үлэһитэ, Ил Дархан стипендиата, СӨ Аар Дархан этээччитэ Розалия Тихонова. Туруорааччы режиссер — СӨ култууратын туйгуна Розалия Тартакынова. Олоҥхо-испэктээк сценарийын СӨ Үтүөлээх артыыһа, А.Е. Кулаковскай аатынан Судаарыстыбаннай бириэмийэ лауреата, Арассыыйа култууратын Үтүөлээх үлэһитэ Афанасий Федоров суруйда. Режиссер сүбэһитэ — СӨ ускуустубатын Үтүөлээх диэйэтэлэ, Судаарыстыбаннай бириэмийэ лауреата Александр Титигиров. Режиссер көмөлөһөөччүтүнэн Култуура департаменын үлэһитэ Нюргуяна Хахырова, көстүүм худуоһунньугунан «УЛУУ» танас, киэргэл бренд ааптара Марина Андреева үлэлээтилэр.
Ньурбабыт оҕолоро биир санаанан салайтаран, ис сүрэхтэриттэн кыһаллан, сыраларын ууран туран оруолларын толордулар. Куорат үрдүк сыанатыгар сүрэхтэнэн, сүргэлэрэ көтөҕүлүннэ.
«Күн Тэгиэримэн Бухатыыр» олоҥхо-испэктээги көрөөччү, дьон-сэргэ ытыс хабыллар тыаһынан уруйдуу-айхаллыы көрүстүлэр. Үтүө тыл үгүһэ этилиннэ. Ол курдук, СӨ судаарыстыбаннай сүбэһитэ, Геокултуурунай сайдыы институтун салайааччыта Андрей Саввич Борисов, Ил Түмэн судаарыстыбаннай мунньах дьокутаата Владимир Михайлович Прокопьев, СӨ култуураҕа уонна духуобунай сайдыыга миниистирин солбуйааччы Мария Васильевна Турантаева, «Ньурба оройуона» муниципальнай оройуон баһылыгын социальнай боппуруостарга солбуйааччы Наталья Семеновна Петрова, олоҥхо-испэктээк сценарийын суруйбут, Аан Алгысчыт Афанасий Семенович Федоров, бырайыак ааптара Розалия Михайловна Тихонова, Семен Степанович Егоров-Оһоокой Сэмэн сиэннэрэ олоҥхобут туһунан истиҥ тылларын анаатылар, оҕолорго ситиһиилэри баҕардылар.
Ньурба култуурата
—