«Күндээдэ» ААУо салайааччыта Сергей Захаров Дьокуускайга Уһук-Илиҥҥи федеральнай уокурук эрэгийиэннэрин племенной сүөһү иитиитин сайыннарар сулууспаларын сүбэ мунньаҕар кытынна.
Тэрээһин чэрчитинэн Марха микро-оройуонугар саҥа азотнай-кислороднай ыстаансыйа, «Дьиэ сүөһүлэрин сиэмэлэрин уонна эмбрионнарын судаарыстыбаннай баана» аһыллыыта, искусственнай сиэмэлээһин ыстаансыйатын племенной атыыр оҕустарын быыстапката ыытылынна. «Сахаагроплем» тэрилтэ үлэтин-хамнаһын билистилэр. «Сохранение и развитие отечественных генофондных пород сельскохозяйственных животных – основа продовольственной независимости России», «Пути развития и проблемы племенного животноводства в регионах Дальнего Востока» тиэмэҕэ сүбэ мунньах ыытылынна. Уһук Илин эрэгийиэннэрин Искусственнай сиэмэлээһиҥҥэ кииннэрин икки ардыгар сөбүлэһии түһэрсилиннэ. Нам улууһун Өргөлөөх сэлиэнньэтигэр «Саха сүөһүтэ» генофонднай тэрилтэ хаһаайыстыбатын көрдүлэр, Үс Хатыҥҥа «Прокопьев М.М.» бааһынай хаһаайыстыба кымыс ферматын үлэтин-хамнаһын билистилэр.
Бу улахан тэрээһин чэрчитинэн «Сахаагроплем» салайааччыта Алексей Жирков «Күндээдэ» ААУо дириэктэрэ Сергей Захаровка «Көмүс күһүн-2023» XXV Арассыыйатааҕы агропромышленнай быыстапка наҕараадатын – кыһыл көмүс мэтээли уонна диплому туттарда. Биһиги хаһаайыстыбабыт бу наҕараадатын племенной уонна табаарынай производствоны сайыннарыыга үрдүк көрдөрүүтүн иһин ситистэ. Дипломҥа РФ тыатын хаһаайыстыбатын миниистирэ Д.Н.Патрушев илии баттаабыт.
Улууска бастыҥ көрдөрүүлээх үлэлээх И.В.Николаев-Бытык Уйбаан аатынан «Күндээдэ» ААУо бары үлэһиттэрин уонна бэтэрээннэрин үрдүк наҕарааданан эҕэрдэлиибит!
Геннадий Антонов