Ил Дархан Айсен Николаев ыйааҕынан 2024 сыл тохсунньу 1 күнүттэн 25-гэр диэри саастаах саҥа ыал буолбут эдэр кэргэнниилэргэ биир кэмнээх төлөбүр көрүллүбүтэ.
💞Олунньу 14 күнүгэр, Тапталлаахтар күннэригэр Ньурбатааҕы ГТАС дьиэтигэр 50 000 солкуобай суумалаах сэртипикээти саҥа ыал буолбут Күндээдэ нэһилиэгин олохтоохторугар Анна Васильевна, Лев Николаевич Ананьевтарга туттарыы үөрүүлээх түгэнэ буолан ааста.
Үөрүүлээх тэрээһиҥҥэ улуустааҕы ГТАС салайааччыта Альбина Ивановна Алексеева Анна, Лев Ананьевтарга ыал буолуу туоһу суругун туттарда. Эдэрдэр кыһыл көмүс биһилэхтэри илиилэригэр кэттилэр.
Улуус баһылыгын солбуйааччытын э.т. Ольга Афанасьева эҕэрдэ тыл эттэ, Үлэ уонна социальнай сайдыы министиэристибэтин иһинэн Ньурба улууһунааҕы социальнай харалта салалтатын салайааччыта Ирина Афанасьевна Находкина үөрүүлээх быһыыга-майгыга 50 000 суумалаах саҥа ыал буолар дьиэ кэргэҥҥэ сэртипикээти, 🌹🌹🌹сибэкки дьөрбөтүн туттарда,
«Россельхозбаан» АО Саха сиринээҕи салаатын дириэктэрэ Василий Васильевич Тимофеев саҥа ыал буолар дьиэ кэргэҥҥэ эҕэрдэ тыл эттэ уонна «Россельхозбаан» дьиэ кэргэннэргэ аналлаах өҥөлөрүнэн туһаналларыгар ыҥырда. «Күндээдэ нэһилиэгэ» МТ баһылыга Яков Евгеньевич Замятин нэһилиэк дьаһалтатын уонна тус бэйэтин аатыттан эҕэрдэлээтэ.
Ньурба улууһунааҕы социальнай харалта салалтатын салайааччыта Ирина Находкина:
💑- Быйыл, 2024 сыл Арассыыйаҕа Дьиэ кэргэн, Саха сиригэр Оҕо сыла биллэриллибитинэн, дойдубутугар араас хайысхалаах социальнай көмөлөр оҥоһуллаллар. Ол курдук 25 саастарыгар диэри бастакыларын ыал буолбут эдэр дьоҥҥо биир кэмнээх төлөбүр көрүллэр.
Эдэр ыал 2024 сыл тохсунньу 1 күнүн кэнниттэн холбоспут уонна иккиэн эрдэ сокуонунан ыал буола сылдьыбатах буоллахтарына туттарыллар.
Кэргэнниилэр Саха сиригэр олорор, пропискалаах буолуохтаахтар. Атын сиргэ пропискалаах уонна быстах кэмҥэ Саха сиригэр олорор буоллахтарына көмө көрүллүбэт. Эдэр ыалтан иккиттэн биирдэстэрэ е-Якутия порталга киирэн биир сайабылыанньа толоруон наада. Сокуонунан ыал буолан баран 6 ый иһигэр сайабылыанньа киириэхтээх, — диэн кылгастык билиһиннэрдэ.
Тэрээһин эдэр дьиэ кэргэннэри кытары өйдөбүнньүк хаартыскаҕа түһүүнэн түмүктэннэ.
Антонина Семенова