Тохсунньу 17 күнүгэр Күндээдэ нэһилиэгэр «Күндээрэ» түмсүү 10 сылыгар аналлаах тэрээһин буолла.
«Күндээрэ» түмсүү 2014 сыллаахха төрүттэнэн үлэлиир. Түмсүүнү СӨ тыатын хаһаайыстыбатын туйгуна, СӨ бочуоттаах бэтэрээнэ, уопсастыбанньык Светлана Алексеевна Замятина салайан үлэлэтэр.
«Күндээрэҕэ» олоххо тардыһыылаах, холобур буолар үтүө мааны сайаҕас майгылаах күн күбэй ийэлэр, эйэҕэс эбээлэр, нэһилиэк бочуоттаах олохтоохторо, сыана бэтэрээннэрэ сылдьаллар. Кинилэр үөрэ-көтө мустан сонуннарын, үөрүүлэрин, хомолтолорун үллэстэллэр. Ыллыыллар, үҥкүүлүүллэр, иискэ үөрэнэн араас дьэрэкээн көстүүлээх олбохтору тигэллэр.
Анал байыаннай дьайыыга көмө оҥороллор, доруобуйаларын бөҕөргөтүнэн фитнэһинэн, хаалыктаах хаамыынан дьарыктаналлар. Нэһилиэккэ, улууска ыытыллар тэрээһиннэргэ кыттан сэргэхсийэллэр, дьону сэргэхситэллэр.
«Күндээрэ» түмсүүгэ «Туску» норуот айымньытын дьиэтин үлэһиттэрэ СӨ култууратын үтүөлээх үлэһитэ Яковлева Светлана Михайловна, СӨ култууратын туйгуннара Ефремова Иринада Николаевна, Платонова Альбина Дмитриевна уо.д.а.кураторынан ананан үлэлэһэллэр, сүбэ-ама буолаллар.
«Күндээрэлэр» эйэҕэстэй эбээлэр 10 сыл» диэн ааттаах кинигэ сүрэхтэниитэ буолла.Кинигэ тахсыытын туһунан түмсүү салайааччыта Светлана Замятина :»Күндээрэ» түмсүү бэйэ-бэйэбитин өйөнсөн үөрүүлээх, ыарахан да күннэрбитигэр мэлдьи бииргэ буолабыт.
Эдэр дьиэ кэргэннэргэ, билиҥҥи көлүөнэ ыччакка үтүө холобуру көрдөрөбүт.Күндээдэбит чэчирии сайдарын туһугар сэмэй кылааппытын киллэрэр күн-күбэй ийэлэр, ытык мааны эбээлэр ааттарын үйэтитэн, «Күндээрэ» түмсүү үбүлүөйдээх сылынан өйдөбүнньүк буоллун, кэлин да оҕолор, сиэннэр, аймах-билэ дьоннорбут өйдөбүнньүк быһыытынан хаалларалларыгар диэн санааттан, бу дьоҕус кинигэбит күн сирин көрдө», — диэн мустубут дьоҥҥо билиһиннэрэн эттэ.
Үбүлүөйнэй тэрээһиҥҥэ улуустааҕы бэтэрэннэр сэбиэттэрин бэрэссэдээтэлэ Татьяна Олесова, улуустааҕы Ытык Сүбэ сэбиэтин бэрэссэдээтэлэ Галина Николаева, Күндээдэ тыа сирин түөлбэтин баһылыга Яков Замятин, Күндээдэтээҕи оскуола, балыыһа, агрофирма, «Кэнчээри» оҕо уһуйаана, Ньурба куораттан «Сардаҥа», Чаппандаттан «Алгыма» Ньурбачаантан «Сүбэ», Күндээдэттэн «Далбар-Ай» түмсүүлэр кыттыыны ыллылар, эҕэрдэ эгэлгэтин эттилэр.
Тэрээһини «Кэнчээри» уһуйаан сэбиэдиссэйэ, нэһилиэк Сэбиэтин сэкиритээрэ, СӨ үөрэҕириитин туйгуна Венера Степанова салайан ыытта. Олохтоох ырыаһыттар, үҥкүүһүттэр бүгүҥҥү тэрээһини киэргэттилэр.
Түмүккэ үбүлүөйнэй туорт тула хаартыскаҕа түһүү буолла.
Антонина Семенова