СӨ ситэриилээх былааһын ааспыт сыллааҕы үлэтин отчуота Күндээдэҕэ сууххайдык, судургутук ааһан түмүктэннэ.
10-тан тахса сыллааҕыта бастакынан уотунан сылыттыыга киирэн олорор буолан, итиэннэ кэнники сылларга элбэх эбийиэк, ол иһигэр саҥа оскуола, оҕо уһуйаана, арыы собуота, балыыһа дьиэлэрэ үлэҕэ киирэн, олохтоохторо санаалара нүөл, бөҕөх уонна кэпсэтиилэрэ даҕаны биир оннук.
Улууска элбэх тутуу үлэтэ барарыттан астыналларын биллэрэллэр, баһылык Алексей Михайлович Иннокентьевка махталларын тиэрдэллэр.
Нэһилиэк олохтооҕо Ольга Варламова кулууп дьиэтэ тымныытынан сибээстээн, кулууп дьиэтин хапытаалынай өрөмүөнүн туруоруста. Лидия Долгунова СВО кыттыылаахтарын дьиэ кэргэттэрин аатыттан, СВО кыттыылаахтарын дьиэ кэргэттэригэр кииннэммит сылыттыыга уонна гааска холбооһуҥҥа көмө баарын курдук, уотунан сылытыыга холбонууга уонна ититэр оборудованиены саҥардыыга көмө олохтонуутун туруоруста.
Розалия Борисова уот мөлтөҕүн, кыайбатын, ол иһин оһоҕунан отторго саһаан мас атыыласпытын, уот элбэхтэ арахсыытыгар электроприбордар умайалларын эттэ, саҥа подстанция быйыл туруорулларын-суоҕун ыйытта. Бары ыйытыыларга толору хоруйдар бэрилиннилэр.
Ил Түмэн дьокутаата Георгий Балакшин СӨ норуоттарын 9-с Спортивнай оонньууларынан сибээстээн, Күндээдэтээҕи норуот айымньытын дьиэтин өрөмүөнэ приоритетнай быһыытынан өрө тутуллуохтааҕын тоһоҕолоото.
Кэпсэтиигэ Борис Спиридонов тыа сиригэр ыччат кэлэн үлэлииригэр анаан толору хааччыллыылаах исписэлиистэр дьиэлэрэ тутуллуохтааҕын, нэһилиэк ходуһаларыгар уу киирэрин-тахсарын сүрүннүүр инниттэн шлюз-регулятор тутулларын туруоруста.
Күндээдэ нэһилиэгин баһылыга Яков Замятин «Олорор дьиэ» федеральнай бырагырааманан 6 кыбартыыралаах олорор дьиэни тутарга сайаапка ыыппыттарын, Саха сириттэн 10 маннык бырайыак, ол иһигэр Ньурба улууһуттан кинилэр бырайыактара барбытын эттэ. 6 кыбартыыралаах дьиэ уопсай сыаната – 70 мөл.сок. кэриҥэ, 12 мөл. солк. «гарантийканы» булбуттар.
Улуус баһылыга Алексей Иннокентев Күндээдэ «Туску» норуот айымньытын дьиэтэ нацпроегынан хапытаалынай өрөмүөнэ оҥоһуллуохтааҕын, сыаната 30 мөл. солк. буоларын эттэ, бу үлэ уочаракка сылдьар. Ааспыт сылга 52 СВО кыттыылаахтарын дьиэ кэргэттэрин дьиэлэрэ улуустааҕы бырагырааманан хапытаалынайдык өрөмүөннэннэ эбэтэр толору хааччыллыы киллэрилиннэ.
СӨ Бырабыыталыстыбатын Бэрэссэдээтэлин солбуйааччыта Георгий Степанов түмүк тылыгар улууска элбэх тутуу үлэтэ барарын бэлиэтээтэ, отчуокка кыттыбыт олохтоохторго истиҥ махталын тиэртэ.
Геннадий Антонов