Лоп курдук отут ордугуна үс сыл анараа өттүгэр Күндээдэҕэ Сунтаар Сиэйэтиттэн эдэр ыал көһөн кэлбиттэрэ. Бу Александр, Анастасия Долгуновтар иккис оҕолоро, соҕотох уоллара, икки сыллааҕыта ыал буолбут Васялаахтара этэ.
Василий Новосибирскайга «монтажник-высотник» диэн идэҕэ үөрэнэ сылдьан бүтэрэр сылыгар Кемерово куоракка практикатын кэмигэр устудьуоҥка Лиданы көрсөн кийиит гынан сүгүннэрэн кэлбитэ. Эдэр дьон бастаан утаа кыыс дойдутугар олорон баран Күндээдэҕэ олохсуйардыы көһөн кэлбиттэрэ.
Лидия Валерьевна олохтоох дьаһалта сэкирэтээринэн уонтан тахса сыл үлэлээбитэ. Мин кинини «элбэх оҕолоохпун, соло гыммат үлэлээхпин» диэбэккэ оскуола, уһуйаан, кулууп үлэтигэр актыбыыс бэрдэ буоларынан билэбин уонна олус сыаналыыбын.
Алын кылааска учууталлыыр сылларбар «Айылҕан» диэн төрөппүттэр уонна уруу аймах дьон түмсүүтүн тэрийэн үлэлэппитим. Дьэ онно түмсүү биир да тэрээһиниттэн туора турбат төрөппүттэринэн Долгуновтар буолаллара.
Аны ийэ киһи илиитигэр сатабыллаах буолан оҕолорго «Уус тарбахчааннар» куруһуогу ыыппыта. Кылаас таһынан үлэни тэрийиигэ тэҥҥэ сылдьыһар, сүбэ-ама, өйөбүл буолар кини этэ.
Василий, Лидия Долгуновтар сэттэ оҕолоохтор. Улахан кыыстара Алена ыал буолан Удачнайга олорор, юрист үөрэхтээх, Настя Үлэ уонна социальнай сулууспа министиэристибэтин иһинэн социальнай төлөбүр уонна социальнай сулууспа үбүнэн өйөбүлүн Киин исписэлииһэ, Нарыйа «Уруу» ювелирнай хампаанньаҕа, оттон Алена Санкт Петербург куоракка «Татнефть АЗС Северо-Запад» хааччахтаммыт эппиэтинэстээх тэрилтэҕэ үлэлииллэр.
Улахан уоллара Максим Анал байыанньай дьайыыга бастакы мобилизацияҕа ыҥырыллан Одун Хаантан оҥоһууланан, Чыҥыс Хаантан дьылҕаланан Мөҥүрүүр Бөҕөттөн төлкөлөнөн уол оҕо буолан сиргэ кэлбит аналын чиэстээхтик толоро сылдьар.
Икки кыраларыттан Сашалара устудьуоҥка, мурун бүөтэ Сергей 10 кылаас үөрэнээччитэ. Оччотооҕу эдэр ыал күн бүгүн «эһээ, эбээ» дэтэр дьоллоох дьон.
Кэнники аҕыс сыл Лидия Валерьевна оскуолаҕа дьыала-куолу дьаһайааччынан үлэлээбитэ. Биһиги уһуйааммытыгар сиэн кыысчаана сылдьар буолан эмиэ актыбыыс бэрдэ эбээ буолар. Кини иллэҥ буолла да күрүчүөгүнэн боростуой саарпыктан саҕалаан муодунай бэйэлээх былааччыйаҕа тиийэ таҥас арааһын баайар.
Аны сиэнигэр анаан иитээччилэр тылларын быһа гыммакка көрдөрөн үөрэтэр-иитэр, тутан-хабан оонньуу нөҥүө сайыннарар тэриллэри баайан сөхтөрөр. Ол курдук «Таал-Таал эмээхсин» остуоруйаны, дьыл кэмнэрин, тарбах тыйаатырын дьоруойдарын араас өҥнөөх сабынан баайбытын кырачаан дьон бэркэ сэҥээрэллэр.
Маны таһынан ийэ кыргыттарын кытта үҥкүүлээн «Аймахтыыллар ыллыыллар, уруулуулар туойаллар» уһуйааммыт урукку сылларга үгэс буолбут кэнсиэрин биир бастыҥ толорооччулара буолааччы. Лидия билигин да бөлөҕүнэн үҥкүүгэ кыттар сэргэх киһи.
Бэрт аҕыйах саҥалаах, сэмэй майгылаах, кыыһыра-тымта сылдьыбат эйэҕэс бэйэлээх ийэ — Лидия Валерьевна — оҕолоругар, сиэннэригэр күндүттэн күндү киһи, оттон киниэхэ дьиэ кэргэнэ сирдээҕи олох дьоллоох уйата буоллаҕа.
Венера Степанова, Күндээдэ