Иванов Георгий Иванович 1976 с. Маалыкайга Зоя Афанасьевна, Иван Трофимович Ивановтар диэн ыалга күн сирин көрбүтэ. 1996 с. Маалыкай оскуолатын бүтэрэн баран Маардааҕы СПТУ-га үөрэнэн суоппар идэтин ылар уонна Маалыкайга ИП-га суоппарынан үлэлээбит. Онтон Накыыҥҥа 2003-2009 сс. баһаарынай часка үлэлиир.
Убайа Герман Нерюнгри куоракка үлэлии барар. Онон 2010 с. Нерюнгрига көһөн бараллар. Манна Георгий «Якутуголь» тэрилтэ «Мечел» хампаанньатыгар 230 т. уйуктаах бэйэтэ 130 т. ыйааһыннаах «Белаз» массынаны баһылаан таас чох таһар, кэлин «Газпром» тэрилтэҕэ көһөн баһаарынай массыынаҕа үлэлиир. 2018 с. Маалыкай кыыһыныын Рожина Ньургуйааналыын ыал буолаллар. Билигин сүүрэ сылдьар кыыстаахтар. Нерюнгрига дьиэ атыылаһан олороллор.
Георгий Иванович уоппускатыгар сири-дойдуну кэрийэрин сөбүлүүр. 2014 с. Сочи Олимпиадатын уонна 2008 с. Пекиҥҥэ параолимпийскай оонньууларын көрбүтэ. Ону таһынан Таилаҥҥа, Камбоджаҕа, Африкаҕа, Египеккэ тиийэ сылдьыбыта. Манна кини Сахара кумах куйаарын таһынан Гизы куоракка сылдьан Хеопс пирамидатын көрбүтэ. Онтон дьэ үрдүк хайалары дабайар.
2024 с. Чегет хайа үрдүгэр 3 км 150 м, онтон Терскол хайаҕа тахсар. Ити курдук бэлэмнэнэн баран Эльбрус өргөһүгэр 5 км 642 миэтэрэ үрдүккэ тахсар. Бу улахан ситиһии. Итинник үрдүккэ тахсарга доруобуйа уонна дьулуур, тулуур баар буолуохтаах. Тоҕо диэтэххэ 3 биэрэстэттэн үөһэ кислород аҕыйаан сүрэх тэбиитэ, хаан баттааһына уларыйарын тулуйуллуохтаах эбит.
Георгий Иванович бэйэтэ маннык кэпсиир:
«Эльбрус Кабардино-Балкарияҕа баар Арассыыйа уонна Европа саамай үрдүк хайата. 2024 сыл ыам ыйын 11 күнүгэр Терскол диэн бөһүөлэккэ 4 буолан кэлбиппит, биһиги группабыт экстрим группа этэ. Балааккаҕа хоно сылдьыбыппыт, атын группаҕа 15 киһи баара.
Бастакы күммүтүттэн эрчиллэн саҕалаабыппыт. Эльбрус анныттан саҕалаан бастакы күн 30 км хаампыппыт, ол иннинэ бэйэм сыл аҥаара курдук эрчиллибитим, бэлэмнэммитим. Иккис күн Чегет диэн хайаҕа тахсыбыппыт, 3 км тахса үрдүк хайаҕа. Ол кэннэ иккис группа дьонуттан 4 киһи аккаастанан туораабыта.
Үһүс күн Пик Терскол диэн обсерваторийа баар сиригэр тахсыбыппыт, 3150 миэтэрэ үрдүккэ. Төрдүс күҥҥэ Гарабаши диэн 3 км 750 миэтэрэ үрдүккэ турар базаҕа тахсыбыппыт, манна эмиэ инструктордары кытта эрчиллии, экстремальнай түгэннэргэ бэлэмнэнии ааспыппыт.
Алтыс күҥҥэ Камни Пастухова диэн 4 км 700 миэтэрэ үрдүккэ тахса сылдьыбыппыт, тыал-куус сүрдээх, дабылыанньа да баттыыра олус, төбө ыалдьар, сүрэх тэбиитэ күүскэ түргэтиир. Манна элбэх быраабыла баар, холобура, аллараа төҥкөйөр уонна түргэнник хамсанар көҥүллэммэт, тымырдар быстыахтарын сөп. Ол курдук Камни Пастухова үрдүктэн түһэн баран бэрэбиэркэ аастыбыт, мин сатурациям түспүт, 87 буолбут этэ, кислород тиийбэтиттэн. Онон чуут сыыйылла сыспытым, сарсыныгар нуорма буолбута. Ити сырыы кэнниттэн икки группаттан 19 киһиттэн биһиги 4 буолан хаалбыппыт, мин саамай саастаахтара этим.
Икки күн тыал күүстээх буолан Гарабаши базаҕа олорбуппут, тыал 70 км/ч тиийэрэ. Онтон дьэ халлааммыт тупсан ыам ыйын 18 түүн 12 диэкиттэн Эльбрус чыпчаалын дабайарга туруммуппут. Халлаан туран биэрбитэ. Ол эрээри эт-хаан өттүнэн олус ыарахан, дабылыанньаттан төбө ыалдьар, хотуолуоххун баҕараҕын, кислород тиийбэт буолан утуйа сыһаҕын, төбөҕөр чыпчаалга тиийиэхтээхпин эрэ диэн сыал. Туора-маара көрбөккүн, кыра сыыһа-халты туттуу олох сэрэхтээх.
Ыам ыйа сезон буолбатах дьиҥэ, тымныы уонна чыпчаал диэки муус хайа, биир уолбут халтырыйан түһэ сыспыта, хата страховочнай тростаах, ледорубтаах этибит, онон ол ЧП этэҥҥэ ааспыта. Хаста да сынньанан ыам ыйын 19 күнүгэр күнүс 11 ч диэки Эльбрус чыпчаалыгар үктэнэр дьолго тиксибиппит.
Бу олох кылгастык суруйдум, уратыта олус элбэх уонна сэрэхтээх сырыы. Арассыыйа уонна Европа саамай үрдүк туочукатыгар тахса сылдьыбыппыттан киэн туттабын уонна бу тахсыыбын ийэбэр Иванова Зоя Афанасьевнаҕа аныыбын диэм этэ».
Бэлэмнээтэ
Вера Соловьева
Айанньыт бэлиэтээһинэ