Сэтинньи 20 к. Ньурба түмэлин быыстапкалыыр саалатыгар Малдьаҕар нэһилиэгин быыстапкатын аһыллыыта буолла.
Ньурба Малдьаҕара — Марха эбэ үрдүгэр турар биир ураты, кэрэ айылҕалаах, баай устуоруйалаах нэһилиэгинэн буолар. Малдьаҕар сирэ элбэх улуу дьоннордооҕунан биллэр. Ол курдук, Саха аптаныамыйатын бөҕөргөтүспүт, өрөспүүбүлүкэ бастакы наркомнара бырааттыы Донскойдар, судаарыстыбаннай диэйэтэл В.И. Максимов, Аҕа дойду Улуу сэриитин кыттыылааҕа, Рейхстаг эркинигэр «Были и Мы из Якутии…» суругу хаалларбыт Ф.С. Донской, биллэр, улахан учуонайдар Ф.Г. Сафоронов, М.Г. Сафронов, В.В. Семенов, саха норуота сөбүлээн истэр ырыаһыта Н. Семенов уо.д.а.
Быыстапка аһыллыыта Малдьаҕар талааннаах ыччата Сулустаана Григорьева тойугунан, Анита Слепцова «Дойдум миэнэ — Малдьаҕар» ырыанан саҕаланна. Үгэс буолбуттуу кэлбит ыалдьыттары кымыһынан, арыылаах алаадьынан күндүлээтилэр.
Быыстапка аһыллыытынан эҕэрдэлээтилэр «Ньурба оройуона» МТ баһылыгын 1-кы солбуйааччыта В.Н. Семенов, Ньурба түмэлин дириэктэрэ А.А. Туманова, оройуон Сэбиэтин дьокутаата В.С. Моисеев, улуус бэтэрээннэрин Сэбиэтин бэрэссэдээтэлэ Т.П. Олесова, Култуура департаменын аатыттан Д.И. Бурнашева, «Ньурба куората» МТ тэрийэр салаатын исписэлииһэ О.И. Данилова.
Тыл этээччилэр Малдьаҕар нэһилиэгиттэн улууспут биир саамай элбэх киэн туттар улуу дьонноро үүнэн-сайдан тахсыбыттарын бэлиэтээтилэр, элбэҕи саҥаны билбиттэрин эттилэр. Быыстапкаҕа бырааттыы Донскойдар ааттарын сүгэр оскуола түмэлиттэн нэһилиэк устуоруйатын кэрэһэлиир элбэх матырыйаллар, былыргы маллар, дьэрэкээн иһиттэр-хомуостар киирбиттэр. Маны таһынан, билиҥҥи иистэнньэҥнэр тигиилэрэ, уустар оҥоһуктара дьон кэрэхсэбилин ыллылар.
Малдьаҕар баһылыга А.А. Степанов сиһилии нэһилиэк олоҕун, үлэтин туһунан сырдатта. Ол курдук, билигин Малдьаҕар нэһилиэгэр 415 киһи олорор, В.И. Максимов аатын сүгэр оскуолаҕа 52 үөрэнээччи билиини ылар, «Чуораанчык» уһуйааҥҥа 37 оҕо үүнэр-сайдар. Маны таһынан, Ньурба оройуонун кииннэммит бибилэтиэкэ ситимин филиала, Арассыыйа почтата, 2020 с. тутуллан киирбит А.Т. Михайлова аатын сүгэр толору хааччыллыылаах ФАП, Никииппэр Сэмиэнэп аатынан Норуот айымньытын киинэ үлэлэрин быспакка, ситиһиилээхтик үлэлии тураллар. Эдэр исписэлиистэргэ тутуллубут уопсай дьиэлэр, кыһыннары тэрилтэлэри, олохтоохтору сылааһынан хааччыйар улахан модульнай хочуолунайдар үлэҕэ киирбиттэр. Тыа хаһаайыстыбатын туһунан сырдатар буоллахха, 2018 сылтан Ыстаапанап Өлөксөөндүр уола Айыы Сиэн салайыытынан тэриллиилээх хаһаайыстыба өрө күүрүүлээхтик үлэлиир, олохтоох нэһилиэнньэни, ыаллыы сытар нэһилиэктэри этинэн-үүтүнэн хааччыйар.
Нэһилиэк баһылыга Александр Александрович Ньурба түмэлигэр Малдьаҕар оскуолатын туһунан уонна «Бастакынан суолу солообуттар» диэн сэдэх кинигэлэри бэлэх уунна.
Бары Ньурба олохтоохторун Малдьаҕар нэһилиэгин быыстапкатыгар сылдьаргытын ыҥырабыт. Быыстапка сэтинньи 25 к. диэри дьон-сэргэ көрдөрүүтүгэр туруоҕа.
Ньурба түмэлин пресс-сулууспата
Н.Н. Филиппов хаартыскаҕа түһэриилэрэ