Тохсунньу 7 күнүгэр Малдьаҕардааҕы “Никииппэр Сэмиэнэп аатынан Норуот айымньытын киинигэр” айылҕаттан талааннаах норуот ырыаһыта, оһуохайдьыт, тойуксут Филиппов Егор Данилович – Көөкөт төрөөбүтэ 95 сылыгар аналлаах “Ороһооспотооҕу ахтылҕан ырыа” дьоро киэһэтэ буолан ааста.
Бу кэнсиэри көрөөрү Маалыкайтан, Хатыыттан, Чуукаартан, Ньурбаттан кэлэннэр кулуупка тобус-толору киһи муһунна. Концерт иннигэр Көөкөт Дьөгүөр саамай улахан оҕото, кыыһа, элбэх оҕолоох ыал ийэтэ, эбээтэ, хос эбээтэ Муза Егоровна Саввинова тыл этэн, ырыа ыллаан саҕалаата. Аҕыс бииргэ төрөөбүттэр оҕолорунаан, сиэннэринээн, хос сиэннэринээн бары ыллаан-туойан, үҥкүүлээн, бииртэн-биир чаҕылхай нүөмэрдэринэн дьоннорун-сэргэлэрин үөртүлэр. Бары даҕаны аҕаларын, эһэлэрин удьуордаан, айылҕа маанылаан бэрсибит кэрэ-мааны куоластаахтар.
Саамай долгуйа күүппүт, ватсабынан зал маатыгар сытан ыллыыра өрөспүүбүлүкэ үрдүнэн тарҕанан, дьон сүрэҕин абылаабыт, биһиги киэн туттар ырыаһыппыт, «Туой Хайа» өрөспүүбүлүкэтээҕи ырыа күрэҕин кыайыылааҕа Вячеслав Егорович Филиппов гитаратын туппутунан сценаҕа тахсан, олус үчүгэй, истиҥ-кэрэ ырыаларын ыллаан дьиэрэппититтэн олус да астынныбыт, дуоһуйдубут.
Бу Дьөгүөр оҕолоро ырыаһыт эрэ буолбатахтар, кинилэр өссө уран тарбахтаахтар. Эдьиийдии-балыстыы Айталина Егоровна Тортоюсова уонна СӨ норуот уус-уран айымньытын маастара Екатерина Егоровна Афанасьева тикпит «Төрүт өбүгэбит таҥастарын» коллекциятын көрдөрбүттэрэ эмиэ биир кэрэ көстүү буолла.
Концерт түмүгэр улахан убайдара Данил Егорович байаанын уонна Вячеслав Егорович гитаратын доҕуһуолугар бары тахсан «Аҕам алааһа» диэн ырыаны толордулар.
Ол кэнниттэн киирии билиэтинэн (250 солк эрэ сыаналаах) элбэх сүүйүүлээх лотерей тэҥнээһинэ буолла. Олус элбэх кус-хаас, мас көтөрүн арааһа, куобах, убаһа, баайтаһын ынах эттэрэ, сылгы быара-хартата, тыла, дьиэ кууруссатын сымыыта, сүөгэй, тоҥ отон, моонньоҕон барыанньата, ону таһынан араас иһиттэр, туттар тэриллэр.
Элбэх киһи аска-үөлгэ тиксэн олус үөрдүлэр-көттүлэр. Сүрүн бирииһи — телевизоры Анал байыаннай дьайыы кыттыылааҕа Духов Егор аҕатыгар Духов Николай Прокопьевичка түбэспитэ чахчы үчүгэй бэлэҕинэн буолла.
Бу дьоро киэһэни Көөкөт Дьөгүөр сиэнэ Филиппова Туйаарыма Максимовна оһуокай түһүлгэтинэн түмүктэннэ. Филипповтар бу тэрээһиҥҥэ киирбит үптэрин Анал байыаннай дьайыыга кытта сылдьар биир дойдулаахтарыгар анаатылар.
Бу маннык Аҕаларын аатын үрдүктүк тутан, үтүө аатын үйэтитэн, төрөөбүт дойдуларыгар олус үчүгэй тэрээһини бэлэх ууммуттара бука барыбытыгар үтүө холобурунан буолла. Кинилэр хайдах курдук түмсүүлээхтэрин, иллээхтэрин чаҕылхай туоһутун илэ харахпытынан көрөн астынныбыт. Көөкөт Дьөгүөр ыччаттарыгар бука барыларыгар улахан махталбытын тиэрдэбит, куруук маннык ырыаны-тойугу өрө тутан, кэрэни-үтүөнү эрэ кэрэһэлии, айа-тута сылдьыҥ, иллээх-эйэлээх, чэгиэн-чэбдик, дьоллоох буолуҥ!
Елена ИВАНОВА