Мэҥэдьэккэ Василий Гоголев-Уйулҕан «Хаҥаластан хааннаахтар. Тигиилээхтэн төрүттээхтэр. Уһун Дьуона» историческай арамааныгар олоҕуран туруоруллубут испэктээк премьерата буолла!
Биир дойдулаахтарбыт уонна ыаллыы нэһилиэктэр В.В. Степанов аатынан норуот тыйаатырын артыыстарын өйүү, сыаналыы диэн көрөр сааланы толору муһуннулар, сөҕө-махтайа испэктээги биир тыынынан көрдүлэр.
Даҕатан эттэххэ, бу испэктээгинэн олунньу 25 күнүгэр тыйаатырбыт норуот аатын сүгэр чиэһин көмүскэниэхтээх. Испэктээк режиссердарынан буоллулар Алена Данилова, Айылгылаана Степанова.
Оруолларга саҥа сүрэхтэммит да, урут норуот тыйаатырыгар оонньообут уопуттаах да артыыстар бааллар.
Бу туруорууга барыта холбоон 37 киһи кыттыыны ылла, тыаһа-ууһа тыыннаах доҕуһуолунан барда. Дьон-сэргэ сэҥээрдэ.
Испэктээк кэннэ урукку норуодунай тыйаатыр артыыстара сүбэ-ама, ыйыы-кэрдии биэрдилэр, бэйэлэрин санааларын эттилэр уонна тыйаатыр норуот аатын салгыы сүгэ сылдьарыгар баҕардылар.
Матрена Габышева, Мэҥэдьэк