Ньурба оройуонун Н. И. Кочнев аатынан 1-Хаҥалас орто оскуолатын иһинэн улэлиир “Центр поддержки общественных инициатив” АНО бу саас Ил Дархан граныгар «Молодёжь против коррупции!» диэн бырайыагынан кыттан кыайыылаах аатын сүкпүтэ. Эдэр ыччат, үүнэр көлүөнэ билиҥҥи дьалхааннаах, балысханнык сайдар кэмҥэ сөптөөхтүк бэйэлэрин салайынан, киирэн биэрбэттэрин, араас куһаҕан дьайыыларга утары туралларын туһугар сыалламмыт бырайыак номнуо үлэтин саҕалаабыта. Бырайыак хамаандатыгар Саха Өрөспүүбүлүкэтин Ил Дарханын иһинэн коррупция хабааннаах уонна да атын быраабы кэһиилэри сэрэтэр управление сүбэ-ама биэрэр, тэҥҥэ үлэлэһэр. 
Бырайыак чэрчитинэн эдэр ыччаттарга, ол иһигэр улахан кылаас оҕолоругар, коррупция туһунан сырдатыы, араас оонньуулар, көрсүһүүлэр буолаллар. Ньурба оройуонун эдэр көлүөнэтин барытын хабар сыалтан үлэни 3 куустаҕа (бөлөххө) арааран ыытабыт – Марха, Маалыкай, Ньурба куусталарыгар. Сэтинньи 27 күнүгэр бырайыак хамаандата Маалыкай куустатыгар- Хатыы нэһилиэгэр, сэтинньи 29 кунугэр Марха куустатыгар- Хаҥалас нэһилиэгэр семинардары ыытта.
Семинары проект салайааччыта Антонова Елена Никитовна коррупция диэн тугун, историятын билиһиннэрииттэн саҕалаата, виртуальнай музей көрдөрдө. Саха Өрөспүүбүлүкэтин Ил Дарханын иһинэн коррупция хабааннаах уонна да атын быраабы кэһиилэри сэрэтэр управление “Кэскил” хаһыат редакциятын кытары оҥорбут “Дьоһуннааҕы кэпсэтии” (“Разговоры о важном”) бырайыактарын билиһиннэрдэ, кылаас салайааччылара оскуолаларга маннык кылаас чаастары ыытыахтарын сөбүн эттэ. Хатыыга Ньурба ИДьМ иһинэн ПДН старшай инспектора Кириллина Мария Витальевна, Хаҥаласка Ньурба оройуонун ИДьМ начальнигын солбуйааччыта, подполковник Алексеев Николай Борисович үүнэр көлүөнэҕэ коррупция уонна билиҥҥи кэм куһаҕан көстүүлэрин туһунан иһитиннэрдилэр, аһаҕас кэпсэтии ыыттылар. Хаҥалас оскуолатын иитии өттүгэр дириэктэри солбуйааччыта Васильева Анна Владимировна «Бэйэ оонньуута» диэн коррупцияҕа, правовой билиигэ сыһыаннаах олус интэриэһинэй викторина-оонньуу ыытта.
Бу курдук «Молодёжь против коррупции» бырайыак эдэр ыччат куһаҕан дьайыыларга сыстыбаттарын, онно утары туралларын туһугар сыаллаах ыытыллар. Инникитин ыччаттарбыт коррупцияны утаран дьиҥнээх патриот буолуохтара диэн саарбахтаабаппыт.
«Ыллык» пост, Хаҥалас Ньурба.