Тохсунньу 31 күнүгэр Ньурба тыйаатырыгар оройуон оскуолаларыгар үлэлиир тыйаатыр кэлэктииптэрин ыккардыгар ыытыллар «Мүчүк» көрүү күрэҕэ иккис төгүлүн ыытылынна.
Бу Ньурбатааҕы 3 №-дээх оскуола, үөрэҕирии салаатын, «Кыталык» КД уонна Ньурба тыйаатырын кытта бииргэ ыытар күрэхтэрэ быйыл Аҕа дойду Улуу сэриитигэр Кыайыы 80 сылыгар ананна. Күрэх аһыллыытыгар Ньурба оройуонун үөрэҕирии управлениетын салайааччытын солбуйааччыта Сергей Васильев, СӨ норуодунай артыыһа Борис Борисов, Ньурба тыйаатырын эдэр артыыһа Никита Григорьев кыттааччыларга эҕэрдэ тылларын анаатылар, ситиһиилэри баҕардылар.
Дьүүллүүр сүбэҕэ Ньурба оройуонун үөрэҕин управлениетын иитэр уонна эбии үөрэхтээһин салаатын сүрүннүүр специалиһа Семенов В.Н., АГИКИ устудьуона Григорьева С.В., төрөппүттэр Ноговицын В.П., Столярова М.Н., Арассыыйатааҕы оҕо уонна ыччат бастыҥнар хамсааһыннарын муниципальнай координатора Ефремова Ж.И., Ньурба тыйаатырыттан СӨ култууратын туйгуннара Анисимов Л.А., Семенова М.Е. үлэлээтилэр.
Барыта 15 оскуолаттан 239 үөрэнээччи күрэххэ кытынна.
Бастакы бөлөххө: С.С.Потапов аатынан Убайаан орто оскуолата – Анна Неустроева “Тиргэһиттэр”(сал. Иванова Т.С., Егорова Р.П.). Ньурбатааҕы 3 №-дээх алын сүһүөх оскуолатын «Мүчүк» тыйаатыр кэлэктиибэ – Уйбаан Бахсылыырап “Умнар бырааппыт суох” (сал. Семенов Р.А., Михайлова С.И., Герасимова С.Е.). В.И.Максимов аатынан Малдьаҕар орто оскуолатын «Сырдык сүүрээн» тыйаатыр кэлэктиибэ – Ольга Ушканова «Күн сырдыга» Малдьаҕар нэһилиэгэр буолбут дьиҥнээх олохтон дьүһүйүүтэ (сал. Слепцова Л.С.). М.С.Иванов-Багдарыын Сүлбэ аатынан Ньурбачаан орто оскуолатын «Бэтиэхэчээн» тыйаатыр кэлэктиибэ – И.А.Дмитриев –Сиэн Чолбодук “Ытыс бурдук” (сал.Николаева З.З.). С.С.Сүүлүскэй аатынан Сүлэ орто оскуолата – Иван Гоголев «Саллаат сүрэҕэ» (сал. Николаева З.С., Иванова О.С.).
Иккис бөлөххө: П.С.Егоров аатынан Акана орто оскуолата – Прокопий Николаев «Сэрии кэмин оҕолоро» (сал. Соркомова А.П.). «Ньурба эрэлэ» оҕо хамсааһына – Дьип Захаров «Ол күн» (сал. Захаров Д.П.). 41 үөрэнээччини кытыннарбыт М.С.Егоров аатынан Ньурба 2 №-дээх орто оскуолатын «Кыымчааннар» тыйаатыра – Дмитрий Пономарев-Дьолуолаах «Биһик» (сал. Тимофеева А.А.). К.Д.Уткин аатынан Марха орто оскуолата – Анатолий Иванов «Оонньоммотох оҕо саас» (сал. Иванов А.Г.). Элбэх кыттааччылаах Н.Н.Чусовской аатынан Антоновка орто оскуолатын “Айуу, чэ” тыйаатыр устуудьуйата – Д.Бубякин “Герой Советского Союза майор Чусовской” кинигэтин матыыбынан “Ньурба ньургун уола” (сал. Матвеева Н.В.). М.В.Мегежекскэй аатынан Маалыкай орто оскуолата – Александр Фадеев «Эдэр гвардия» (сал. Николаева М.А.). Алексеев С.П.-Боһуут аатынан Чаппанда орто оскуолата – А.С.Захаров-Хоҥкуй Өлөксөй туһунан «Ытык аҕа» (сал.Павлова С.А.). Маар орто оскуолата – Саргылана Федорова «Журавлиный крик» документальнай дьүһүйүүтэ (сал. Федорова С.П., Габышев Е., Семенова С., Васильев К.В., Егорова Н.Н.). А.Н.Чусовской аатынан Ньурбатааҕы техническэй лицей – Николай Антонов «Почта таһааччы» (сал. Михайлов Нь.В.). Е.К.Федоров аатынан Хорула орто оскуолата «Көрсүһүү» музыкальнай дьүһүйүү (сал. Тобонова А.В.).
Кыттааччылар Ньурба тыйаатырын «АРТик» студиятын иитиллээччилэрин толоруутугар Егор Афанасьев уочаркатынан Маргарита Васильева-Хотууна туруорбут “Сэрии тулаайаҕа” испэктээгиттэн быһа тардыыны көрдүлэр (салайааччылар СӨ култууратын туйгуна Вера Лазарева, Маргарита Васильева).
Көрүү күрэх түмүгүнэн анал ааттарынан бэлиэтэннилэр:
«Лучшая женская роль» — Николина Алексеева, «Ньурба Эрэлэ» оҕо хамсааҺынын иитиллээччтэ.
«Лучшая мужская роль» — Мирослав Николаев, Антоновка орто оскуолатын үөрэээччитэ.
«Лучшая режиссерская работа» — «Дьикти саас», Маар орто оскуолатын тыйаатыра.
«Лучшее музыкальное оформление» — «Уруһуйдар», Хорула орто оскуолатын тыйаатыра.
Алын сүһүөх оскуола тыйаатырдарын бөлөҕөр кыайыылаахтарынан буоллулар:
1 миэстэ — Ньурба алын сүһүөх оскуолатын тыйаатыра.
2 миэстэ — «Бэтиэхэчээн», Ньурбачаан орто оскуолата.
3 миэстэ — «Весь мир театр», Малдьаҕар орто оскуолата.
Улахан бөлөххө:
1 миэстэ — «Айуу чэ», Антоновка орто оскуолатын тыйаатыра.
2 миэстэ — «Ньурба Эрэлэ» оҕо хамсааһына.
3 миэстэ — «Кыымчааннар», 2 №-дээх Ньурба орто оскуолата.
Оттон Гран-при сүрүн бирииһин — көһө сылдьар кубогы уонна 5 тыһыынчалаах сертификаты Николаева Маргарита Анатольевна салайааччылаах М.В.Мегежекскэй аатынан Маалыкай орто оскуолатын «Кустук» тыйаатыр кыттааччылара Александр Фадеев айымньытынан «Эдэр гвардия» туруорууларын иһин туттулар.
Ньурба тыйаатырын анал бириистэрин — олунньу 13 күнүгэр буолуохтаах «ҺӨҔҮҤ» испэктээккэ ыҥырыыны Чаппанда оскуолатын үөрэнээччилэрэ уонна кулун тутар 28 күнүгэр остуоруйа премьератыгар ыҥырыыны Убайаан орто оскуолатын оҕолоро ыллылар.
Ньурба тыйаатырын пресс-киинэ