Антоновка клубугар баччаларга сылын аайы региональнай таһымнаах «САДУОБА» күрэҕэ ыытыллар. Нэһилиэкпит бочуоттаах олохтооҕо, СӨ култууратын туйгуна, дуобакка маастара хандьыдаат, самодеятельнай композитор, мелодист Николай Сеялов аатыгар ыраахтан-чугастан өрүүтүн дьон бөҕөтө мустар.
Бу сырыыга эр дьон, дьахталлар, ветераннар диэн үс категорияҕа 38 кыттааччы баар. География киэҥ: Сунтаар, Үөһээ Бүлүү, улуустан — Ньурба, Антоновка, Маар, Чуукаар, Дьиикимдэ. Кыттааччылар саастара 33-тэн 88-ка диэри. Сүрүн судья — Анна Яковлева.
«Түһүлгэ» НАДь салайааччыта Матрена Захарова тэрээһини тус бэйэтэ курируйдуур, сценарий суруйан ыытааһыныгар тиийэ бэйэтэ сылдьар. Матрена Прокопьевна аҕа коллегата, биир үөлээннээҕэ аата үйэтитиллэн, Николай Николаевич суох буолуоҕуттан бэйэтэ тэрийэр күрэҕэ билигин да ньиргийэн турар.
Тэрээһин Сеяловтар дьиэ кэргэн, олохтоох дьаһалта, спорт управлениетын, САДУОБА федерациятын өйөбүллэринэн ыытыллар. САахымат, ДУОбат, БАарыс төбөнү бэрткэ үлэлэтэллэр. Манна даҕаны тыҥааһыннаах киирсиилэр.
Түмүк хас биирдии көрүҥҥэ туспа баар, уопсай эмиэ тахсар. Олунньу 24 күнүгэр ыытыллыбыт күрэххэ Николай Николаевич кэргэнэ Анастасия Дмитриевна уонна оҕолоро туруорбут 10 тыһ. чыпчаал приһы Ньурба Убайааныттан 66 саастаах Семен Тимофеев ылла.
Төһө да кэм аастар бу курдук бары өттүнэн дэгиттэр киэн туттар киһибит аата ааттана турар. Маны таһынан Николай Николаевич аатынан улуус ыһыаҕар ырыа күрэҕэ тэриллэр, нэһилиэккэ анал бириэмийэ баар.
Октябрьскай нэһилиэк дьаһалтатын пресс-киинэ