Саҥа дьыллааҕы уһун өрөбүллэргэ Эдьигээҥҥэ улахан саахал тахса сылдьыбытын билэбит. «СӨ ОДьКХ» ГУП Ньурбатааҕы филиалын үлэһиттэрэ тиийэн саахалы туоратыста. Бу туһунан тэрилтэ дириэктэрэ Алексей Тихоновтан туоһуластыбыт.
«ОДьКХ» ГУП Ньурбатааҕы филиалын кылаабынай инженерэ Антон Костин салалтатынан 8 киһилээх биригээдэ баран үлэлии сылдьар, — диир Алексей Степанович. – Суһал бөлөх састаабыгар аварийнай-диспетчерскэй сулууспа салайааччыта Григорий Николаев икки үлэһитин кытта, «Амакинка» хочуолунай маастара Аркадий Александров 1 үлэһитин кытта уонна «Новай» хочуолунайтан 2 үлэһит киирбиттэрэ.
Эдьигээҥҥэ биһиги «Вертолетка» уонна «Амакинка» хочуолунайдарбытыгар баар оһохтор курдук хочуоллар үлэлииллэр. ТЛПХ диэн чоҕу хочуол иһигэр сыап курдук эрийэн сыҕарытар ыарахан чугуун транспортер (5 туонна ыйааһыннаах) алдьаммыт эбит. Биһиги уолаттарбыт онно сөптөөх чааһы илдьэ барбыттара. Тохсунньу 5 к. үүнэр түүнүгэр 3 чааска бөртөлүөтүнэн көппүттэрэ. Онно тиийэн «ОДьКХ» Эдьигээннээҕи филиалын биригээдэтин кытта бииргэ үлэлээтилэр. 2 хочуолу чөлүгэр түһэрдилэр, сылааһы биэрдилэр. Өссө даҕаны үлэлии сылдьаллар, барытын оҥорон, оннун булларан, биэс-хас күн үлэлииллэрэ буолуо.
Бэйэбит улууспут туһунан эттэххэ, хаһан баҕарар тымныыларга буоларын курдук кыра саахаллар бааллар. Тохсунньу 5 к. «Көтөр фабриката» 10 кВ уот линиятыгар саахал тахсан уот уһуннук арахса сылдыбыт кэмигэр, хочуолунайга дизели холбоон үлэлэппиппит. Тымныыларга уу ситимэ, септик тоҥуута баар, ону аварийнай биригээдэлэр тахсан үлэлээн туораталлар.
Геннадий АНТОНОВ