Кулун тутар 7 күнүгэр, Е.М.Поликарпов аатынан “Эйгэ” Норуот Айымньытын киинин үлэһиттэрин көҕүлээһининэн Аан дойдутааҕы Дьахталлар күннэрин көрсө тэрилтэлэр кэрэ аҥаардара тыа дьахтарын сатабылын көрдөрөр “Дьээрэ, кыргыттар” түөрт түһүмэхтээх тыҥааһыннаах, көрдөөх спортивнай күрэх буолан ааста.
Хас биирдии түһүмэх саҕаланар сиригэр былаахтар анньыллыбыттар. Барыта иккилии киһилээх түөрт хамаанда кытынна. Бастакы түһүмэххэ стартан сүүрэн кэлэн бэрэбинэни тутан илдьэн илии эрбиитинэн ортотунан эрбээтилэр. Бу түгэҥҥэ умнулла быһыытыйбыт малынан туттарга ким хайдах сатабыллааҕын көрдөрө.
Иккис түһүмэххэ эрбэммит кэрчиктэрин илдьэн колун сүгэнэн түөртүү хардаҕас гына хайыттылар.Манна кыргыттарбыт сүгэнэн бэрт үөрүйэхтик тутталларын көрөн бары да сөхтүбүт.Кэлэр түһүмэххэ хардаҕастарын көтөҕөн илдьэн чыыппааннаан сылабаар уматан чэй оргуттулар, ол кэннэ остуол тэрийэн ас бэлэмнээн мустубуттары күндүлээтилэр. Сандалыларыгар ас арааһа тардыллыбыт. Күрэҕи дьүүллүүр сүбэ Иванова У.А.,Андреева К.В., Саввинов Н.А.кыраҕы харахтарынан көрөн сыаналаатылар.
Түмүккэ балыыһа, ветеринария холбоһуктаах хамаандата (Васильева Алена , Казакова Варвара ) –I , «Ымыычаан” оҕо уһуйаана (Назарова Нарыйа , Яковлева Татьяна) –II , дьаһалта уонна кулууп холбоһуктаах хамаандата ( Кириллина Лена, Степанова Наталья) – III миэстэлэри ылан грамоталарынан уонна сэмэй бэлэхтэринэн наҕараадаланнылар.
Киэһэ кулуупка кэлбит кэрэ аҥаардарга тэрилтэ эр дьоно тюльпан сибэкки дьөрбөтүн туттаран сүргэлэрин көтөхтүлэр. Салгыы остуоллаах, “Үүт үкчү” артыыстары үтүктэр көрдөөх нүөмэрдэрдээх, ырыалаах-тойуктаах, соһуччу сүүйүүлээх оонньуулаах, аралдьытар көрдөөх күрэх буолла.
“ Үүт үкчү” кэрчиккэ Марина Попованы,Николай Донскойу, Бүөккэ Бөтүрүөбү, Олимпияны, Маша Распутинаны үтүктэн көрдөрөн көрөөччү биһирэбилин ыллылар. Сүүйүүгэ тиксибиттэр бырааһынньыктааҕы настарыанньалара икки бүк үрдээтэ. Көрдөөх күрэхтэргэ кыттыбыттар эмиэ бары уоскутар бириис ылан үөрдүлэр.
Кулун тутар 8 “Бизнес леди -2024” урбаан эйгэтигэр үлэлиир кэрэ аҥаардар оройуоннааҕы күрэхтэригэр нэһилиэккэ ыытыллыбыт “Миссис Чуукаар-2024” күрэх кыайыылаҕа Нюргуяна Степанова киирэн кытынна. Манна сөҕө бэлиэтээбиппит диэн, атын нэһилиэктэртэн ким да кыттыбатаҕын. Биһиги кыыспыт куорат урбаанньыт дьахталларыттан туох да итэҕэһэ суох кытынна. Дьахтар кэмитиэтэ, дьаһалта, кулууп уонна «ДариЯ» маҕаһыын түмсэн кыттааччыбытын өйөөтүлэр, тэҥҥэ сылдьыстылар. Түмүккэ Нюргуяна Степанова “Леди интеллект” анал номинацияҕа тиксэн үөрүүлэрэ үрдээтэ.
Улуус Сүбэтин бэрэссэдээтэлэ Ньургуйаана Михайлова үрдүк сыанаттан Чуукаар нэһилиэгин чопчулаан бэлиэтээн, үчүгэй тыллары этиитэ истэргэ олус үөрүүлээх. Нэһилиэкпит «ДариЯ» маҕаһыын хаһаайкатыгар ИП Ньургустана Афанасьеваҕа хайҕабыл тыллары этэн туран, махтал суругу туттарда.
Надежда Казакова, Чуукаар