Ньурба Чуукаарыттан сонуннар

📝 Муус устар ый саҕаланыыта Чуукаар нэһилиэгэр Ньурба оройуонун нэһилиэктэрин аҕа баһылыктарын Сэбиэтин сүбэ мунньаҕа ыытылынна. Нэһилиэктэргэ ТОС-тары , НКО-лары регистрциялааһын, быйылгы  үлэ былааннарын, сайыҥҥыкэмҥэ айылҕа баһаарыттан сэрэхтээх буолуу, ыһыахтар тэрээһиннэрин тула кэпсэтии буолла.

Улуустааҕы ыччат дьыалатын имидж политикатын  управлениетын салайааччыта Валерия Владимирова уонну Култуура департаменын салайааччыта Розалия Тихонова иһитиннэрии оҥордулар. Бу кэннэ кэлбит ыалдьыттар үлэни сынньалаҥы сэргэ тутан, Ытык Сэттэ Мырааҥҥа алгыстаах хаамыыга сырыттылар.Куоначчааҥҥа муус аннынан балыктаатылар.

Муус устар 7 күнүгэр “ Национальный чемпионат по роботехнике -Красноярск 5,0” робототехникаҕа чөмпүйэнээтигэр “Ымыычаан” оҕо уһуйаанын оҕолоро Саха сирин 14 бастыҥ хамаандатын иһигэр киирэн, күрэххэ “Дебют” анал ааты ыллылар. Кыттыбыт оҕолор: Андреев Владислав, Иванов Артем, Степанов Тамерлан, төрөппүттэригэр Мария Александровнаҕа, Ульяна Артемовнаҕа, Наталия Сергеевнаҕа ,уһуйааччыларга Сардана Викторовнаҕа уонна Евгения Сергеевнаҕа инникитин өссө үрдүк ситиһиилэри баҕардылар.

Эмиэ бу күн Ньурба Хаҥалаһыгар остуол тенниһин тренеринэн үлэлээбит Иванов Василий Тимофеевич аатынан остуол тенниһигэр Бүлүү бөлөх оройуоннарыгар региональнай остуол тенниһин күрэҕэр Чуукаартан 10 оҕо баран кыттыбыттарын түмүгэр: 2006-2009 сыллаах төрүөх уолаттарга Андреев Владимир — II миэстэ үрүҥ көмүс мэтээл , кыргыттарга Данилова Дария — III миэстэ ылан боруонса мэтээл хаһаайыттара буоллулар. Күрэххэ баралларыгар транспорынан хааччыйбыт төрөппүттэргэ Андрей Андреевка, Тимур Яковлевка махталлара улахан.

Антоновкаҕа алын кылаас оҕолорун икки ардыларыгар ыытыллыбыт хайыһар күрэҕэр Чуукаартан физрук Любомир Иннокентьев салайааччылаах биэс оҕолоох хамаанда эстафетаҕа эрэллээхтик II миэстэ буоллулар.

Сунтаарга Сахаттан бастакы ССРС спордун бочуоттаах маастара биир дойдулаахпыт Петр Еремеевич Алексеев кэриэһигэр ыытыллыбыт хапсаҕай күрэҕэр Чуукаартан спортсаала дириэктэрэ Изабелла Иннокентьева,  дьаһалта исписэлииһэ Сардана Васильева нэһилиэктэн бэрэстэбиитэл быһыытынан баран кэллилэр. Күрэххэ II миэстэни ылбыт Айаал Петровка (Марха) «Чуукаар нэһилиэгэ” МТ аатыттан 50000 солк бириис туттардылар.

Муус устар 8 күнүгэр “Сэттэ” хампаанньа исписэлиистэрэ кэлэн тутулла турар оскуола акылаатын бетонун хас да туочкаттан экспертизаҕа ыллылар. Анал экспертиза түмүгэ бу нэдиэлэ бүтүүтэ биллиэ. Оскуола тутуутун улахан матырыйаала, хочуолунай тутуутун матырыйаала суолу баттаһа таһыллан бүтүө.

Муус устар 10 күнүгэр Ньурба оройуонун оскуолаларын спартакиадатын чэрчитинэн ”Хайыһар -2024” күөн күрэс буолла. Тэрээһини “А.Ф.Алексеев” аатынан Чуукаардааҕы орто оскуола, оройуоннааҕы  үөрэҕирии, физкультура уонна спорт салалталара көҕүлээн ыыттылар. Күрэххэ уопсайа 102 оҕо,16 тренер кытынна.Түмүккэ улахан оскуолаларга: Марха -I, Антоновка-II, Ньурба лицей- III Кыра оскуолаларга: Хатыы-I, Чуукаар- II, Дьаархан -III миэстэлэри ыллылар. Дьиэ кэргэнинэн сүүрүүгэ: Чуукаартан Раиса, Аркадий Семёновтар — I Дьаархантан Алена ,Василий Ноговициннар- II, Виктория, Святослав Васильевтар III миэстэ буоллулар. Кэлбит тренердэр сүбэ мунньахтарыгар инникитин да хайыһар күрэҕэ Чуукаарга, кэрэ көстүүлээх Ытык Мыраан анныгар буоларыгар санааларын этиннилэр. Тэлиллибит трассаны өссө төгүл сыныйан көрдүлэр. Күрэххэ бириистэринэн спонсордаабыт нэһилиэк баһылыктарыгар , тэрилтэлэргэ уонна биирдиилээн дьоҥҥо, ону таһынан миэстэтигэр итии аһынан хааччыйбыт кулууп кэлэктиибигэр, тэрээһин буолар былаһааккатын, автостоянка миэстэтин астаран ыраастаабыт тыраахтырдаах Васильев Н.В. тэрийээччилэр махталларын тиэртилэр.

Эрдэттэн эрэннэриллибит тарированнай көрүүчэй 7 тонна уматык, 4 тонна сэлээркэ Чуукаарга кэллэ.

Быйыл олохтоох ветеринария дьиэтигэр улахан өрөмүөн ыытыллара, киинтэн ититиигэ холбонуу үлэтэ барыаҕа. Манна наадалаах матырыйааллары Ньурбаттан тиэйэн аҕалбыт Федоров Е.П. махталларын тиэрдэллэр.Матырыйаал тиэйиитин ороскуотун олохтоох дьаһалта уйунна.

Почта, АТС дьиэлэрэ аварийнай туруктааҕынан сибээстээн почта дьаһалта дьиэтигэр бастакы хоско көстө.

Ветеринария салайааччыта Алексеева Н.С. иһитиннэрбитинэн билиҥҥи туругунан нэһилиэккэ 120 ынах,10 биэ төрөөбүт.

Муус устар 11 күнүгэр оройуоннааҕы оҕо спартакиадатын чэрчитинэн Ньурбаҕа ыытыллыбыт мас тардыһыытын күрэҕэр бэйэлэрин ыйааһыннарыгар Львова Василисса(9 кыл.) –I, Cтепанов Леонид (10 кыл.)- II, Васильев Эльман (9 кыл.) –III бириистээх 🥉🥈🥇миэстэлэргэ тигистилэр.

Муус устар 12 күнүгэр Хаҥалас нэһилиэгэр оройуоннай спартакиада чэрчитинэн буулдьанан ытыы күрэҕэр,Чуукаартан 4 ытааччы кыттыыны ылбытын түмүгэр, 8 улахан нэһилиэктэр истэригэр 5 миэстэ буоллулар.

Муус устар 13 күнүгэр оройуон киин балыыһатыттан флюорографияҕа түһэрэр биригээдэ тахсан олохтоох балыыһаҕа үлэлээтэ.Нэһилиэнньэттэн барыта 180 киһи сырытта.

Муус устар 14 күнүгэр Ньурба оройуонун үөрэҕирии тэрилтэлэрин үлэһиттэрин спартакиадатыгар дуобат күрэҕэр “А.Ф.Алексеев” аатынан Чуукаар орто оскуолатын хамаандата 🥈-II миэстэ буолла. Оскуола чиэһин көмүскээтилэр Данилова А.Н., Николаев В.В., Степанов А.И.

✍“Чуукаар нэһилиэгэ» МТ пресс киинэ