Саҥа үүммүт сылга Чуукаар нэһилиэгэ ааҕааччыларга анаан сонунун үллэһиннэ.
Тохсунньу ый бүтүүтэ тыа хаһаайыстыбатын исписэлииһэ Степанова Н.С. нэһилиэнньэттэн эрдэттэн аска-үөлгэ сакаас хомуйбута Аллараа Бэстээхтэн кэлэн, «Саха фермер” маҕаһыын үлэһиттэрэ ириис,макарон ,туус уонна гранулированнай уотурба аҕалан удамыр сыанаҕа атыылаатылар.
СӨ Ис дьыалаҕа министиэристибэтин Ньурбатааҕы салаатын ИДЬМ начальнигын солбуйааччыта Уаров С.А. салайааччылаах бөлөх 2023 сыллааҕы үлэлэрин Чуукаар олохтоохторугар отчуоттаатылар. ГАИ, ПДН уонна участковайдар үлэлэрин кэпсээтилэр. Нэһилиэкпитигэр Моисеев Сахастал Алквиадович саҥа участковай ананан үлэлиир буолла.
Булт саатыгар кытаанах бэрэбиэркэ барыахтааҕын сэрэттилэр, докумуона суох саалаахтар сааларын туттаралларыгар сүбэлээтилэр. Туттарар түгэннэригэр гладкоствольнай сааҕа – 6000 солк., нарезной сааҕа – 8000 солк. төлөнөр. Маны таһынан төлөпүөнүнэн массыанньыктартан сэрэхтээх буоларга, билбэт нүөмэрдэргэ эппиэттээмэҥ диэн сүбэлээтилэр.
Нэһилиэк дьокутааттара нэһилиэги үс түөлбэҕэ араарарга этии киллэрбиттэринэн, “Кэскил” уонна “Кэнчээри”,”Алгыс” уонна “Сэргэ” түөлбэлэри холбуурга ,”Эбэ” түөлбэни оннунан хаалларар, хаалларбат туһунан олохтоохтортон ыйыталаһыы барбытын түмүгэр, нэһилиэнньэ утарбатын биллэрэн “Хампах”,”Уһун күөл” уонна “Эбэ” диэн түөлбэлэргэ араарылыннылар.
Инникитин нэһилиэкпитин тупсарар сыаллаах араас бырайыактарга, граннарга кыттан судаарыстыбаттан үбүнэн көмө ыларга табыгастаах буоллун диэн нэһилиэккэ ТОС тэринэргэ диэн быһаарыныы ылылынна.Бу быһарыныыны дьокутааттар бигэргэттэхтэринэ ТОС регистрацияланан үлэлээбитинэн барыахтаах.
Олунньу 2 күнүгэр Чуукаарга Е.М.Поликарпов аатынан “Эйгэ” Норуот Айымньытын киинигэр “Аптаах холбука” араас хайысхалаах бэрт сэргэх маастар кылаастар киэһэлэрэ ыытылыннылар.Манна Николаева Р.П.аныгылыы тэтимнээх зумба хамсаныыларын көрдөрдө, Саввинова Л.А. тортка кириэминэн сибэкки түһэриитин үөрэттэ, Спирдонова Л.В. нумерологияны билиһиннэрдэ, Степанова Н.Е. толстовканы хайдах быһарга маастар кылаас биэрдилэр.
Чуукаардааҕы П.Алексеев аатынан спортзал дириэктэрин эбээһинэһигэр Иннокентьева Изабелла Константиновна ананан үлэлиир буолла.
Эми-тому аптека нөҥүө сакаастаан атыылыыр пуун олохтоох дьаһалтаҕа үлэлиир буоларынан, манна медик үөрэхтээх пенсионер Прокопьева Раиса Прокопьевна үлэлииргэ сөбүлэҥин биэрдэ. Билиҥҥитэ пуун графига чопчуланар.
“Чуукаар нэһилиэгэ” МТ пресс киинэ