П.А.Ойуунускай аатынан Саха академическай театрыгар Ньурба улууһа төрүттэммитэ 200 сылын бэлиэтиир үөрүүлээх мунньаҕа саалаҕа толору мустубут көрөөччү ортотугар ыытылынна.
Ньурбаттан төрүттээх биир дойдулаахтарбыт бу күннэргэ дойдуларыгар сылдьыбыт кэриэтэ сананан, араас тэрээһиннэргэ хото сырыттылар.
Бүгүҥҥү тэрээһиҥҥэ СӨ Бырабыыталыстыбатын Бэрэссэдээтэлин солбуйааччыта Георгий Степанов Ньурба дьонун-сэргэтин эҕэрдэлээтэ, инникитин даҕаны дойдугут туһугар бу курдук түмсүүлээхтик үлэлээҥ-хамсааҥ диэн эттэ.
Ил Түмэн Бэрэссэдээтэлин солбуйааччыта Юрий Николаев, Ньурба улууһун баһылыга Алексей Иннокентьев үбүлүөйдээх тэрээһиннэринэн эҕэрдэлээн туран үлэ бэтэрээннэригэр, бастыҥ көрдөрүүлээх үлэһиттэргэ бочуоттаах бэлиэлэри, үрдүк наҕараадалары туттардылар.
Ньурба улууһун Сүбэтин бэрэссэдээтэлэ Нюргуяна Михайлова, СӨ Бочуоттаах Бэтэрээнэ Юрий Наумович Иванов, Ньурба улууһун нэһилиэктэрин баһылыктарын ааттарыттан Сүлэ баһылыга Дмитрий Иванов, эдэр көлүөнэ аатыттан ХИФУ устудьуона Лев Неустроев эҕэрдэ тыл эттилэр.
Үөрүүлээх тэрээһин Россия, СӨ, Саха АССР Үтүөлээх тренерэ Артур Пахомов төрөөбүтэ 70 сылыгар ананар «Дьоһун олох оҥкуллара» испэктээҕинэн түмүктэннэ.
Лена Петрова