Бу күннэргэ улуус баһылыгын солбуйааччыта Валерия Владимирова салайааччылаах Ньурба улууһун 7 киһилээх дэлэгээссийэтэ Кытайга бырааттыы Цзямусы куоратыгар тиийэн үлэлии сылдьар. Цзямусы бырабыыталыстыбатын үлэһиттэрэ биһиги дьоммутун олус үчүгэйдик, аламаҕайдык көрүстүлэр. Поезд ыстаансыйатыгар правительственнай кортеһынан киирэн көрсүһүүлэриттэн саҕалаан барыта, кытайдар ыалдьытымсахтарын уонна бу сырыы түмүгэр элбэҕи күүтэллэрин туоһулуур.
Биһиги дьоммутун Кытайга биир саамай сайдыылаах базалаах, орто медперсоналы бэлэмниир Медицинскэй техникумҥа, 8 №-дээх оскуолаҕа, U9 остуол тенниһин кулуубугар, 1 №-дээх оскуолаҕа сырытыннардылар. Кытай үрдүнэн биир саамай ситэри хааччыллыылаах базалаах, медперсоналы бэлэмниир бу техникумҥа саамай күүскэ сайдыбыт хайысхалара — стоматология уонна офтальмология. Цзямусы к. 8 N-дээх оскуолата 1100 үөрэнээччилээх, нуучча тылын үөрэтэллэр. Биһиги дьоммут Хабаровскайтан тиийэн нуучча тылын үөрэтэр Татьяна диэн учууталы кытта билистилэр. Кытай оҕолоро бэлэмнэммиттэрин, нуучча тылын чобуотук билэллэрин, Арассыыйаҕа бэлиэтэнэр бырааһынньыктарын, үгэстэрин билэллэрин көрдөрөн үөртүлэр.
Ньурба улууһун дэлэгээссийэтэ Цзямусы куорат бырабыыталыстыбатын спорду сүрүннүүр салайааччыны кытта, 2027 с. Ньурбаҕа СӨ норуоттарын IX Спортивнай оонньууларыгар бэлэмнэнии чэрчитинэн, остуол тенниһигэр уонна оҕунан ытыыга Ньурбаҕа кытай тренердэрин аҕалыы туһунан бастакы кэпсэтиини ыыттылар. Кытайдар ити боппуруоһу үөрэтэн көрүөх буоллулар. Тэрилтэлэринэн сылдьыы кэнниттэн Цзямусы куорат бырабыыталыстыбатын эппиэттээх үлэһиттэрин кытта банкекка икки өрүттэр инники үлэлэрин туһунан көдьүүстээх кэпсэтии таҕыста. Бу күннэргэ Ньурба улууһун дэлэгээссийэтэ доҕордуу сибээстээх Цзямусы куоракка киэҥ былааннаах үлэтэ салҕанар.
Бу туһунан улуус баһылыга Алексей Иннокентьев бэйэтин Телеграм-каналыгар суруйда.
«Ньурба» хаһыат