Бу күннэргэ улуус баһылыга Алексей Иннокентьев уонна 3 нэһилиэк баһылыктара Дмитрий Иванов (Сүлэ), Дмитрий Егоров (Түмүк), Михаил Гаврильев (Таркаайы) Анал байыаннай дьайыы зонатыгар тиийэн үлэлии сылдьаллар. Бу улууспут дэлэгэссийэтэ СВО зонатыгар 7-с төгүлүн сырыыта буолар. Дойдуларыттан гуманитарнай көмөнү, дьонноруттан баһыылкалары тиэрдэллэр. Бастаан Ростов-на-Дону куоракка госпитальга сылдьан волонтерга сураҕа суох сүппүт уолаттарбыт докумуоннарын тиксэрбиттэрэ уонна манна бааһыран эмтэнэ сытар биир дойдулаахпытын Ф.Владимиры көрсүбүттэрэ.
Салгыы дьоммут ДНР уонна Запорожье хайысхаларынан СВО-ҕа кытта сылдьар буойуттарга кинилэр сакаастарынан ылыллыбыт гуманитарнай көмөнү, баһыылкалары туттара сылдьаллар.
«Ньурба улууһуттан элбэх киһи СВО-ҕа кытта сылдьар, элбэх билэр дьоммутун көрүстүбүт, — диир улуус баһылыга Алексей Иннокентьев. — Ол иһигэр өр сылларга улуус Сүбэтин бэрэссэдээтэлинэн үлэлээбит Сергей Иванович Евсеев уолун Дьулус Евсеевы уонна улуус Сүбэтин бэрэссээдэтэлэ Нюргуяна Михайлова кэргэнэ, улуустааҕы тыа хаһаайыстыбатын департаменыгар үлэлии сылдьан көҥүл өттүнэн СВО-ҕа тылланан барбыт Леонид Михайловы көрүстүбүт.
Дьоммут этэҥҥэ сылдьалларын көрөн үөрдүбүт. Уолаттар даҕаны көмөнү тутан, дойдуларын сонунун истэн сэргэхсийдилэр. Кыайыыга бигэ эрэллээхтэр. Барыларыгар улуустан уонна Дьокуускайга олорор биир дойдулаахтарбытыттан гуманитарнай көмөнү, ол иһигэр араас оборудованиены, малы-салы, нэһилиэктэр, тыа хаһаайыстыбатын тэрилтэлэрэ, урбаанньыттар биэрбит астарын, «КөмүсКэл» волонтерскай сыах тикпит малларын, оҕолорбут бэлэмнээбит харысхалларын уо.д.а. тиксэрдибит. Сорох сирдэргэ көрсүһүүгэ кыайан кэлбэтэх байыастарбытыгар дойдуларыттан көмөнү, баһыылкалары уолаттарга биэрдибит, кинилэргэ тиксэриэхтэрэ.
Бэҕэһээ Новоукраинка таһыгар элбэх сахалар баар байыаннай чаастарын хамандыыра, биир дойдулаахпыт Альберт Чочановтааҕы көрүстүбүт. Байыастарга позицияларыгар тиийэн, Антоновка олохтоохторо, урбаанньыт Титовтар оҕолоро-сиэннэрэ бэйэлэрин матассыыкыларын байыастарга бэлэхтээбиттэрин илдьэн туттардыбыт. Маннык патриоттуу өйдөөх-санаалаах уолаттарга СВО инники кирбиитигэр дойдубутун көмүскүү сылдьар байыастар улахан истиҥ махталларын ыыталлар. Матассыыкыл кимиэхэ тиксэрин уолаттар сэрэбиэйдэһэн быһаарыах буоллулар.
СВО-ҕа буойуттарга көмөлөһөр улууспут олохтоохторугар уонна Дьокуускайга олорор биир дойдулаахтарбытыгар улахан махталлаахпыт».
Геннадий АНТОНОВ