Дьоһун түһүлгэ 16 оройуон ыччатын, уопсайа 500-чэ кыттааччыны түмтэ.
Сарсыардаттан С.Васильев аатынан сынньалаң уонна култуура паарката олох оргуйар үөһүнэн буола түстэ. Улахан тэрээһин буоларын быһыытынан, сүүрүү-көтүү, кэлии-барыы, сүпсүлгэн, өрө көтө5үллүү, долгуйуу диэн манна. Бэстибээл арыллыытын үрдүк үөрүүтүн өрөспүүбүлүкэбит Ил Дархана үллэстэн, тэрээһин суолтата олус үрдүк таһымнанна. Таһаарыылаах үлэлээх, оройуоммут сайдыытыгар кылааттарын киллэрсэ сылдьар дьоммут на5араадалары туттулар.
Салгыы Дьокуускайтан, атын оройуоннартан ыңырыллан кэлбит, биллэр-көстөр, дьон убаастабылын, биһирэбилин ылбыт спикердар кыттыылаах араас хайысхалаах былаһааккалар үлэлээтилэр. Үөрэ5ирии, култуура, спорт, муниципальнай сулууспа уонна НКО, волонтерство, урбаан, СМИ курдук былаһааккаларга интэриэстээх дьон сылдьан, билиилэрин хаңаттылар, саңаны биллилэр. Оройуоммутун аар-саарга албан аатырдыбыт Сата уустара болгуо уһааран, тимир таһааран, ба5алаахтарга быһах о5устаран киэң сэңээриини тартылар. Култуура былаһааккатыгар фольклорга, кырыымпа5а оонньоон холоннулар. Үгүс сүгүрүйээччилээх спортсменнар Георгий Балакшин, Артем Варданян спорду таптааччыларга маастар-кылаастары биэрдилэр.
«Саха» НКИК телевидениетын дириэктэрэ, редактора Олег Колесов – Талбанныын, Сунтаартан суруналыыс Тускулаана Горохова-Кобельяновалыын, үгүс дьон кутун туппут блогер, урбаанньыт Наталья Оконешниковалыын, Ольга Птицыналыын атах тэпсэн олорон сэһэргэһэн, интэриэһиргиир ыйытыктарыгар хоруйдары ылан, бэстибээл кыттыылаахтара астыммыттарын биллэрдилэр.
Ыччат дьоңңо муниципальнай сулууспа, НКО өйдөбүллэрин экспертэр Дайана Васильева, Дмитрий Куприянов судургу, өйдөнүмүтүө тылларынан быһаардылар, волонтерство туһунан СӨ волонтердары кытта үлэлиир Киин дириэктэрин солбуйааччы Евгений Амбросьев, медик волонтердар штабтарын сокоординатора Алексей Никифоров сиһилии сырдаттылар.
Киэһэтин о5о саас дьоллоох түгэнин бэлэхтиир «пеннай вечеринка», эстрада сулустара кыттыылаах кэнсиэр ыытылынна. Бэстибээл маңнайгы күнэ маннык сэргэхтик түмүктэннэ. Иккис күнэ өссө интэриэһинэй буолара күүтүллэр.
Лина Семенова