Ахсынньы 20 күнүгэр, Ньурбатааҕы көһө сылдьар драматическай тыйаатырга Ньурбаҕа амбулаторнай-поликлиническэй сулууспа тэриллибитэ 100 сыллаах үөрүүлээх бэлиэтээһинэ буолла.
Устуоруйаны сэгэтэн аастахха, 1900 сыллаахха Марха улууһугар 1900 сыллаахха Алексей Попов чааһынай дьиэтигэр дьону эмтиир амбулатория аһыллар. 1904 с. быраас уонна иккис учаастакка фельдшер эмтиир бырааһынан ананан үлэ саҕаланар.
1924 сыллаахха Ньурбаҕа медпуун аһыллар.1942 с. оройуоннааҕы амбулатория, 1972 сыллаахха оройуоннааҕы амбулатория поликлиника буолан, сэбиэдиссэйинэн Попова Елена Алексеевна ананан үлэтин саҕалыыр.Үлэ хаачыстыбата үрдүүр, амбулаторнай-поликлиническэй көмө кэҥиир:флюорокабинет, рентгенкабинет, клиническай лаборатория, физиокабинет, ЛФК уонна массаж кабинеттара арыллаллар.
Бүгүҥҥү күҥҥэ оройуоннааҕы поликлиника 16 идэлэринэн квалифицированнай уопуттаах исписэлиистэр эндоскопия, ультразвуковой, функциональнай диагностиканы баһылаан үлэлииллэр.
Ньурбатааҕы киин балыыһа оройуон олохтоохторугар кэмигэр сөптөөх көмөнү оҥорон кэллилэр.
Тэрээһин үөрүүлээх чааһыгар Ньурба оройуон баһылыгын социальнай боппуруоска солбуйааччы Наталья Петрова үбүлүөйүнэн эҕэрдэ тыл эттэ, ситиһиилээх үлэһиттэргэ оройуон баһылыга А.М.Иннокентьев илии баттааһыннаах бочуотунай грамоталары, Махтал суруктары, сэртипикээттэри туттартаата.
“Ньурба куорат» МТ баһылыга Геннадий Игнатьев, СӨ доруобуйа харыстабылын министиэристибэтин штаты таһынан кылаабынай исписэлииһэ, СӨ терапия уонна уопсай врачебнай практика доцена, мэдиссиинискэй наука кандидата Ульяна Портнягина, Ньурбатааҕы киин балыыһа кылаабынай бырааһа Артем Ксенофонтов, Дьокуускайдааҕы өрөспүүбүлүкэтээҕи онкология диспансерын клиническэй-экспертнэй үлэҕэ кылаабынай бырааһын солбуйааччыта Татьяна Жарникова, “Дьокуускай куорат 1 №дээх поликлиника” АУ лечебнэй үлэҕэ кылаабынай бырааһын солбуйааччы Айталина Данилова, “Капитал Медстрахование” ХЭТ Саха сиринээҕи филиалын отделын салайааччыта Наталья Павлова, маны таһынан Өлүөхүмэтээҕи киин балыыһа бырааһа Александр Николаев, Мииринэйдэҕи киин балыыһаттан Вера Тарасова, Үөһээ Бүлүүтээҕи киин балыыһа сэбиэдиссэйэ Анна Львова эҕэрдэ тыл эттилэр, бочуотунай грамота, махтал суруктары, сэртипикээттэри бэлэхтээтилэр.
Маны таһынан Дьокуускайдааҕы доруобуйа харыстабылын профсойуустарын аатыттан Бочуотунай грамоталары, махтал суруктары туттардылар.
Бэтэрээннэр ааттарыттан өр сыл үтүө суобастаахтык эҥкилэ суох үлэлээн кэлбит СӨ үтүөлээх быраастара Вера Яковлевна Жиркова, Револий Семенович Иннокентьев эҕэрдэлэргэ кыттыһан тыл эттилэр, доруобуйа харыстабылыгар үлэлиир эдэр көлүөнэ үрүҥ халааттаах аанньалларга туһаайан хас биирдии ыарыһахха ханнык да кэмҥэ көмөҕө кэлэргэ бэлэм буолууну ирдиир идэҕэ болҕомтолоохтук сыһыаннаһан үлэлииллэригэр, дьон махталын ылалларыгар этэн туран, саҥаттан саҥа ситиһиилэри, сонунтан сонун арыйыылары, үрдүктэн үрдүк дабайыылары баҕардылар.
Култуурунай чааһыгар Ньурбатааҕы көһө сылдьар драматическай тыйаатыр артыыстара, улуустааҕы киин балыыһа үлэһиттэрэ бүгүҥҥү тэрээһини киэргэттилэр.
Түмүккэ Ньурбаҕа амбулаторнай-поликлиническэй сулууспа тэриллибитэ 100 сыл сурук бэлиэлээх бырааһынньыктааҕы минньигэс туорду улуустааҕы киин балыыһа сэбиэдиссэйэ Иванова Саргылана уонна кэргэннии Жирковтар үөрүүлээх быһыыга-майгыга быстылар.
Антонина Семенова