Үгэс курдук, баччаларга сылын аайы сырыы-айан аһыллыбыт кэмигэр улууспут тыатын хаһаайыстыбатын үлэһиттэрэ идэлээх бырааһынньыктарын бэлиэтииллэр. 10 чаастан Ньурба к. «Кыталык» КД-гар ас-үөл атыыта ыытылынна. Ыраахтан-чугастан улууспут тэриллиилээх хаһаайыстыбалара, тыа хаһаайыстыбатын потребительскэй кэпэрэтииптэрэ, астыыр-үөллүүр тэрилтэлэр, бааһынай хаһаайыстыбалар, агро-оскуолалар, биирдиилээн дьон кытыннылар. Мэлдьи буоларын курдук, Ньурбатааҕы көтөр фабриката сымыыты эрэ буолбакка, арааһы астаан киллэрбиттэрэ сэргэхтик көстөр.
Дьаарбаҥкаҕа ынах, сылгы, сибиинньэ этиттэн уонна үүт аһылыктан саҕалаан, булт этигэр, балыкка тиийэ ас эгэлгэтэ атыыланна. Сыана даҕаны араас, убаһа этин сыаната 700 солкуобайтан 800 солкуобайга диэри халбаҥныыр, убаһа иһин кэмпилиэгэ — 11000-13000 солк, ынах этэ — 750-800 солк, биэ этэ иннэ 1 кг — 500, кэннэ — 550 солк, ынах арыыта 1 кг — 1300 солк., Оттон булт этин этэр буоллахха, куобаҕы — 1500 солк, куртуйаҕы — 800-1000 солк, улары 2000 солк, хааһы — 3000 солк. ылыахха сөп эбит. Собо — 350 солк, тугунуок — 1000 солк, сордоҥ кырата — 180 солк, бөдөҥ соҕуһа — 400 кг. тиийэ атыыланар. Саамай сыаналаах астара сылгы быара эбит, 1 кг 3500 солк. диэри кырайан тахсыбыт, деликатес аһылык буолан кыра кырбаһынан бысталаммыт. Хаһан баҕарар буоларын курдук, эти атаҕынан атыылааччылар эмиэ элбэхтэр. Бу күн дьон кыһыны туоруур астарын хааччынан, аһы-үөлү хамаҕатык атыыласта. Быһа холоон ааҕыынан, бу күн 3,5 мөл. солк. тахса суумалаах ас-үөл киирэн атыыланна.
Геннадий АНТОНОВ.